محمد غبوش يكتب : ماخدين (مسمار) والشمس حية.. ومحتفلين بي (عين) قوية

ضحكت (وشر البلية مايضحك) ووصيفنا الاحمر الدائم يوزع في صور إحتفالية قال أنها لفريق الكرة إحتفالاً بلقب دوري النخبة..

لو تجاوزنا الشكوى.. والمكتب.. والجهد الخرافي لي ناس (الدخيري) .. وأذرع النادي المتحكمة في إتحاد الدمار العام..

لو إتجاوزنا ده كلو.. وروني كيف نقدر نتجاوز (مسمار) الغدار فلومو.. او مسمار (العصرية والشمس (لسة حية) ..

فريق مضروب.. ومهزوم.. ومغلوب.. ومتعلم عليه من (يافع شافع) عمره لم يتجاوز الـ(19) عام.. أطلقوا عليه بأنفسهم لقب (القاصر).. يدعى فلومو..

فريق غلبناهو بي (أصغر شافع) عندنا… يجيب نفس من وين يحتفل.. ويولع شموع.. بدل ما يذرف حزناً على حاله الدموع..

غايتو.. ما كنا قايلين الوضع كان صعب عليكم للدرجة دي..

دي حكاية حقيقة فاتت مرحلة (فرح الغلابة).. لي جيب تورتة وقطعها لعل وعسى أن نتجاوز حاجز الكآبة..

طيب على الأقل كان تدو (الدخيري) معاكم (قرمة) من التورتة دي..

خيل (الدخيري) تجقلب.. والشكر والإحتفال لي ناس مضروب فلومو..

والله خجلنا ليكم عدييييل.. لأنو في كل الدنيا الناس بتغلب في الملعب وبتحتفل في المكتب..

لكن أول مرة نشوف غلب المكتب.. البحتفلو بيهو ناس (شبعو) ضرب في الملعب..
(غبوش)