مجادعات في حب القضارف
نزار الشريف :
طبيعتك ساحرة يا قضروف سعد يا جنه
الغيم والدعاش بعطـــــــــور سماح زجنه
البر والبراح قيس السعـــــــــــــــود فجنه
ساقنا حنين سقانا مــــــعين وليك عجنه
عبدالماجد محمدالسيد:
اصلها ساحرة لكن فيها حب ومحنة
في القضروف اهلنا وعزنا ومسكنا
دي البلد الوحيدة الضامة كل وطنا
دي الارض الخصيبة الجالبة طير الجنة
نزار الشريف:
ربنا خصا قضروف السعد واداها
فاض فيها الجمال من النعيم مداها
العقل النبيه مهما حسب عداها
محال يحسب جمال وديانا واتعدها
محمدكبوشية:
شنِ قُلنا في ريد الحبيب واهلنا
دي الريدها ساكن في الضلوع كاتلنا
نبكي الفراق والطرفة تبكي حُزنا
ننخج في الوداع ذي اللبن في سِعنا
قدر ماتقولو فُتنا رحلنا تأني نجيها وتلقونا إتفنا
صلاح ودمسيخ:
كلما ليكي يا ارض القضارف جينا
تمدي ايديكي بالترحاب وتجري علينا
غير هيبة مناظرك والصفات الزينة
فيك الفرسة والنخوة ومناصح الطينة
عاصم جميل:
بي حب القضارف كم متيم جنً
مصدر أمننا القوتي ودعاش الجنة
ضلها رامي في السودان وللكل جنّ
وحدها نور هدى الأبصار وغيرا دجنَّة
