محمد غبوش يكتب :اعترافات غبوشية : سر الإعجاب بي (زعبله القله) .. الكضاااب
ياجماعة حقيقة كده.. داير أعترف ليكم بي حاجة غريبة..
الحاجة الغريبة دي إني (معجب) بحميدتي سواء إن كان حي أو ميت.. ودي على وزن مقولته الخالده: نحترم المرأة سواء كانت ذكر أو أنثى..
أي والله معجب بيه عديل.. رغم كرهي الشديد ليه.. وعادي ما تشبكوني إنفصام في الشخصية.. وشيزوفرينيا وماعارف شنو كده..
الشعب السوداني الحالي ده كلو عندو (انفصام شخصية) وكل الأمراض النفسية..
المهم.. نرجع لي إعترافي..
العاجبني في (الشخصية) دي.. مع انو مقتنع انو أي زول.. أااااااي زول سايقاهو الإمارات من اضنينو بكون ماعنده شخصية أصلاً..
العاجبني فيه (تمسكه بالحياة) بصورة كبيرة جداً..
زول كل الناس أجمعوا انو مات وشبع موت.. كل يومين تلاته ناطي .. و(ينظر) لينا..
يومين تلاته شنو؟.. ده كل مايشوف ليه (مايك) حايم خشمه بياكلو للتنظير..
مرات بجيب سيرة الكيزان والفيلول.. ومرات أكتر يهاجم في البرهان وكرتي.. ومرات تالته يقوليك نحن جايين الشمالية ونهر النيل وبورتسودان.. وورجغ ورجغ كتيره شديد.. ومتعوده دااااايماً..
الغريبة هو ذاتو ما مقتنع بي كلامه ده وداير يقنعنا نحن بيهو.. وده العاجبني فيهو..
واثق من نفسه أوي..
واحد ممكن يقولي انت لو ماعاجبك كضبه ده.. خلي الميديا دي ..
طيب اصلاً لو كل سوداني ماعاجبو الكضب الحايم في الميديا ده يخليها.. ما ح نلقى سوداني بتعامل مع الميديا تاني..
المهم.. غالبية من ينتظرون طلوعه للحديث.. بكونو (كايسين) ليهم ضحكة.. و(رايحة) ليهم إبتسامة.. بفتشوهم عندو..
وهو ما بصدق.. كل يومين طالع..
امس القريبة دي ظهر بي مقطع قالوا مع جنوده..
زعبلة القلة رجع تاااني يارجاله..
كذلك من الحاجات العاجباني فيهو.. انو كل ظهور بي شكل..
سمعنا بي الرجل العنكبوت.. والرجل الأخضر.. لكن أول مرة نسمع بالرجل (الحرباء)..
مره اليدين بيضاااااا.. ومرة سوده.. والوش ده غايتو حكايتو براها.. غايتو المهندس الشغال للجماعة ديل اصلوا ما انستر معاهم كلو كلو ..
المهم عندهم انه يظهر.. لامن تكون الكهرباء فل ومهندس الروبوتات رايق بظهر في مخاطبة جماهيرية.. ولامن الأمور تكون ما ظابطه بعمل فيديو مسجل..
وحتى في وقت الشده.. بظهر ان شاء الله بي مقطع صوتي.. المهم يظهر.. وينظر..
زول متمسك بالحياة.. وبالظهور ذيو مالاقاني..
(غبوش)
