كل الزوايا
عبدالرحمن دقش..يكتب : ( الرجعه الي الخرطوم … انت السماء بدت لنا !!)
* اراد الله ان تنهزم مليشيا الدعم السريع والجنجويد والمرتزقه وتهرب من الخرطوم عاصمه السودان الفتيه وانتهت حرب 15 ابريل 2023م اللعينه وعاد النازحون الذين ذهبوا الي الولايات الاخري داخل الوطن وذهبت الالاف منهم الي دول الجوار واكثر زحمه في جارتهم مصر في شمال الدوله واخيرا كانت الرجعه الي الخرطوم وهم يرددون ( انت السماء بدت لنا ) والعود احمد وبالفعل فتحت الخرطوم ابوابها الي اهلها بعزه وكرامه !!
* الذي لا ينكر البته ان والي ولايه الخرطوم المكلف المناضل الفريد ( احمد عثمان حمزه ) قد كانت وقفته واستقباله الحار للقادمين الي الخرطوم بلا حدود وهو الذي لم يغادرها وظل ينتظر ويتحرك بلا انقطاع لحل مشاكل اهل الخرطوم واستمر يبحث عن ما يسعد ويفرح العائدين الذين رجعوا الي الخرطوم. !!
* لقد شاهد والي ولايه الخرطوم المكلف احمد عثمان حمزه كل ما حدث من هدم وتكسير وتدمير وفي كل محليات ولايه الخرطوم وكانت كلها من اعمال مليشيا الدعم السريع القذره المشينه وكان معهم الخونه واذناب ( قحت ) القحاته الذين ضاعت منهم الوطنيه الصادقه !!
* حقا وحقيقه لقد شاهد اهل السودان والي ولايه الخرطوم المكلف. ( احمد عثمان حمزه ) يتفقد المباني المهدومه المتكسره ومرافق الوزارات والبنيه التحتيه ومنازل وبيوت اهل الخرطوم. !!
* لقد شاهد اهل السودان فظاعه التدمير وتحطيم العمارات والاسواق والشوارع. التي طفحت بالجثث والزباله بلا حدود. !!
* بمناسبه الزباله يا احمد عثمان حمزه والي ولايه الخرطوم المكلف لقد عرضنا لك حلول دوله المانيا وقلنا لك بعد نهايه الحرب اعمل مراجعه لسفاره المانيا التي كانت تعاني من الوسخ والقرف والزباله داخل الشوارع والمنازل ولمحاربتها. اخترعت ماكينات ( خم ) الزباله والاوساخ بل وصلت الي دفع مليارات اليورو لشراء الزباله من دول الجوار واستفادت من الزباله في الصناعه!! هنا لا نطيل يا والي ولايه الخرطوم المكلف في المزيد ولكن يمكن مراجعه العمود بصحيفه ( اصوات نيوز ) الالكترونيه وفيه التفاسير الكامله !!
* اما العوده الي الخرطوم او الرجعه. فقد استمرت وزادت وقد لاحظ الناس حضور البرهان وعقار وكباشي وياسر العطا وكامل ادريس وكان قد سبقهم الفريق مهندس ابراهيم جابر لعمل وتنفيذ الاصلاح والتنميه !!
* لقد اعلن ان اول اجتماع لمجلس الوزراء سوف يكون اليوم بالخرطوم !!
* الذي اعجب اهل السودان ان العمل والتصليحات بمطار الخرطوم الدولي قد استمرت بجداره وان الاصلاحات تسير علي قدم وساق وسوف يعود مطار الخرطوم الدولي قريبا بالروح الوطنيه الصادقه !!
* لقد سمع اهل السودان من الدكتور كامل الطيب ادريس رئيس مجلس الوزراء الانتقالي ان الوزارات سوف تعود وتدار من الخرطوم وان الاجتماعات مجلس الوزراء سيجد الاهتمام والرعايه والتحري والاصدار من داخل الخرطوم وهنا نقول اليه ما احلي واجمل الرجعه الي الخرطوم وانت السماء بدت لنا والقومه ليك يا وطني !!
* بعد الرجعه الي الخرطوم نطالب وزير الداخليه الفريق شرطه ( بابكر سمره ) ومعه والي ولايه الخرطوم المكلف. ( احمد عثمان حمزه ) توفير الامن الكامل والاعتماد علي نجاحه ولا يود اهل الخرطوم سماع ( تسعه طويله ) والسرقات نهارا جهارا والاغتيالات ولابد من الامن وتحقيقه في كافه احياء ولايه الخرطوم. !! يا وزير الداخليه ويا والي ولايه الخرطوم المكلف بالامس كان انحلال الامن تماما وسمع الذين نفذوا الرجعه الي الخرطوم اغتيال صاحب الدكان في ابوروف بام درمان من جماعه النيقرز في وضح النهار !!
* نطالب البرهان ومالك عقار وبقيه اعضاء وعضوات المجلس السيادي الانتقالي وكامل ادريس رئيس مجلس الوزراء الانتقالي ان يعلموا. ان الرجوع او الرجعه الي الخرطوم من اهلها ان معهم شتي انواع ومشاكل العذاب والعقد الصعبه لما حصل لهم من مليشيا الدعم السريع والجنجويد والمرتزقه. !!
* هؤلاء اصحاب الرجعه الي الخرطوم يضعون علي صدورهم قلاده (هل اتاك ما افسده الدهر في اهل الخرطوم. ) !! بالمناسبه دي يا حكام السودان هل هناك نوعيه خاصه من الامن بعد دخول المنازل المدمره المكسره ؟!!
* الرجعه الي الخرطوم تحتاج الي العديد من الحذر وهل تم فتح ابواب المستشفيات وهل رجعت المدارس والجامعات حتي يستعد الراجعون بكل ثقه ودون خوف ووجع ؟!!
* يا حكام السودان نتفق او لا نتفق ان الحرب ( ولت ) ولن تعود وكيف تسير الخطوات والاعمال بعد الرجعه الي الخرطوم ؟!!
* هل ان المكاتب فاتحه وفيها كراسي وان المرتبات ( ماشه ) عديل دون توقف ؟!!
* ما الذي خططت له الحكومه عن اسعار اللحوم والخضروات والرغيف والبنزين والغاز. ؟!! هل وزاره التجاره والصناعه مستعده لمحاربه الصفوف امام الغلاء ( الفاحش ) ؟!!
* بالمناسبه يا كامل ادريس قالوا ان سعر الرغيفه الواحده تحول من 150 الي 200 بين عشيه وضحاها ويعني 5 رغيفه ( بنادول ) تساوي الف جنيه وهل مرتبات العاملين كافيه لشراء ( رغيفه ذهب ) ؟!!
* نود ان يكون اهل الرجعه الي الخرطوم مع ما قاله الراحل المقيم الدبلوماسي الشاعر الدكتور ( عبدالواحد عبدالله ) ابن القضارف ودا هو القال لاهل السودان ( اليوم نرفع رايه استقلالنا ) ونترك لكم ما قاله لجماعه الرجعه الي الخرطوم ( بيض الوجوه كانهم رضعوا علي صدر القمر ) واضاف ( وسود العيون كانها شربت ينابيع السحر ) !! رحم الله. عبدالواحد ولكن هل نجد ذلك من النازحين الذين اصبحوا من اهل الرجعه الي الخرطوم وفي ذات الوقت نسمع ان ( النيقرز ) يهاجمون نهارا اهل الخرطوم. ؟!!
* في الختام يا حكام السودان هل يتوقع اهل الرجعه الي الخرطوم ان تختفي وتزول ( زنقات ) المشاكل والمحن وهم في رضي يستلمون منازلهم بذلك التدمير والهدم والتكسير وحتي السراير والعناقريب والبنابر والصحون والملاعق والمراوح والمكيفات والثلاجات اختفت وسرقت ولا وجود لها ولكن كتب لها دخول اسواق ( دقلو ) وتباع علنا وانها من حكايات ( ام الكوارث ) !!!
