احمد قمبيري يكتب :معاناة الناس في رقابكم..!!
ملاريا شديدة لدرجة تاخد نوعين من الحقن.. جرثومة معدة.. وتايفويد.. دعواتكم بالشفاء وبعد دة يقولوا ليك الخرطوم ما فيها امراض ولا اوبئة.. يا اخوانا انا مما بدت الحرب دي في ام درمان ما طلعنا منها ولا شبر اتحملنا فيها الكثير من دانات ورصاص طائش وغيره قلنا دي بلدنا ما بنمرق منها نتحمله بكل اوجاعه واسقامه..ومناصرين لقواتنا المسلحة.. بعد دة كلو شي بخلينا نكذب ما في.. يا السيد والي الخرطوم ويا السيد َوزير الصحة انتم مسؤولين امام الله عما يحدث.. ويا السيد وزير التربية والتعليم يا ريت تفعل لجان الرصد وتخليها تسجل ليك حجم غياب التلاميذ في الفصول وكذلك المعلمين.. اتواصلوا يا والي الخرطوم مع المستشفيات وبتاعين الصيدليات وشوفوا كميات الناس البترجع بدون ما تتعالج ولا تشتري ادوية بسبب ضيق ذات اليد.. ما يحدث كارثي بحق وحقيقة ويحتاج لمسؤول شجاع وليس مداهن ولا منافق يخرج للملأ يعترف بالتقصير او يستقيل لأنه ارواح الناس ومعاناتهم امانة في رقابكم.
