فخر الدين عثمان العطا يكتب :بلغ تسلم يأمن غيرك. (2)
وفي الحوش الكبير وتحت ضل النيمة واللمة والونسة المستفة بالحنين.. وحجي الحبوبة عن الزمن الزوين واصيل وقصص وحكايا.. عن ود احمد عشا الضيفان البسد الجوع وينجد لهفة المفجوع كريم وجواد وجودا جود ويدو طويلة لا بخاف الفقر ولا النار البتضحي رماد..
وعن شجاعة الطيب المقدام وقت الحارة شقاق الصفوف البقيف قدام سادر النازلة فارس الحوبة المغوار اسد ضرغام …
وعن سماحة امنة بت محمود عسل منقوع وجيهه صبوح رتينة ضوء وقمر ضواي خالي رتوش جمال بالفطرة رباني وذوقه سليم ونضيمة رزين ولسانه عفيف ما نطق الفحش والشين..
وعن العشاق وغنا الحشمة والسباق في العرضة والسوط والبطان والعشم البصادف تنية من السمحة لي شبال…
وعن الطار والمداح وياليلة ليلك جنه وياليلة ليلك طال والمجذوب بينده للرسول صلاة وسلم علي المختار والدرويش بيترنح علي ايقاع دقة النوبة وحي ياالله حي قيوم ويااللالوبة يااللالوبة والولهان في حب الرسول وسط الحلقة قلب الهوبة…
وما احلاها ياحبوبة ونساتك قصصك حكاياتك والقهوة قدامك بتعدل مزاجاتنا ومزاجاتك.
وحبوبة ياحبوبة ياصافية النية ودفاقة حنية.. حبوبة حكايا وعطايا ورضايا بتكرم الحاضر وتجبر الخاطر.
وتحت الضل وقت ضحوية وحبوبة بتحكي وحبوبة دقست شالته نومة..
وحبوبة لمن تحكي مابتسوقك بالخلا.. بتسوقك بالدرب العديل..
وحبوبة لمن تحكي بتقصد تزرع فيك دماثة الأخلاق ونبل الخصال ومعني المروة وسمات الرجال…
المقدمة اعلاه والالتفاف الحاصل
من مقدمات عريضة وطويلة وقصص وحكايا وسرد مطول علي لسان الحبوبة هي رمزية اردنا ان نقف من خلالها علي تربية الحبوبات وعن الزمن السمح والناس الزينين والجار بمد للجار والجار ببر الجار وكما تواتر الينا من حكم واخبار ( جارك القريب ولا ود امك البعيد ).. والرسول صلي الله عليه وسلم وصي علي حقوق الجار.
وللأمانة الموروث السوداني موروث يستحق الاحتفاء والتمجيد موروث أسس علي الخلق النبيل والسلوك القويم وعلي الشهامة ونجدة الملهوف…
ونعود لالتفافنا والمقدمات الطوال والتي قصدنا عبرها ان نعكس ما الم بنا واعترانا من قبيح الاقوال وسوء الافعال من جهة ضعاف النفوس..
وعندما اجتاحت مليشيا الدعم السريع وعبثت بالديار انكشف المغطي والمستور وكل منا عند العودة للديار وجد البيوت علي الجدار وجارك فقد دولابو وجار جارك عدم القشة ونفاخ النار..
وهذا كله ياعزيزي بسبب المتعاونين والشفشافة.. والشفشافي حقير ماعندو ضمير لا خلي الحبة ولا القطمير..
يا اخوانا بصراحة المتعاونين والشفشافة لازم يندقوا ويمشوا القسم ومن القسم طوالي علي السجن والمتورط في قتل الروح يبلغ الاعدام … ولازم نخلص حقنا منهم…
ولتحجيم نشاطهم الاجرامي وكف الشر والاذية بالتبليغ عنهم اكيد الكل حايأمن شرهم.. والنصيحة العفن ديل مكانهم الطبيعي خلف الاسوار في (الرج)… وفي الرج نقترح فش غبينة كده وبريد بطن يدوهم يوماتي من الصباح عشرين سوط بي سوط العنج المعطون في القطران..
ياخ انا وانت وكلنا موجعين من المتعاونين والشفشافة .. لازم يتبلوا لازم يتبلوا ..
ارحكاكم نمشي نبلغ في القسم..
بلغ تسلم يامن غيرك.
