إطلالة
توفيق جعفر يكتب :
حكايات ود البرعي
لجنة أراضي النازحين (2)
علي عجل، وفي قلق إنعقد إجتماع اللجنـة الفرعية المتخصصة في إسكان النازحين في قرية ود المبارك ، بعد إفتتاح من شيخ إدريس رئيس اللجنـة ، وشرحه بألا يعود النازحون بشيء يكسر خاطرهم، وهم رغبوا في السكن معنا، لما رأوه من طيب معشرنا … و.. الخ
بدر الدين المحامي قال يجب علينا كلجنة ترتيب الأولويات قبل كل حاجة، قريتنا مساحتها محدودة، أولا يحدها( خور ود عشاري) جنوبا، والطريق القومي الدائري شمالا ، غربا مزارعنا وحواكيرنا ، في مساحة شرقا متوسطة وفيها ميدان ساتي عاوزينو لأولادنا الشباب .. ؟
سأله سيف الدين :
_ طيب نشوف المساحة فوق لميدان ساتي دي، خاصة حقتنا، وخايفين ناس قرية ( مبروكة) يخشو فيها …!
(عبد الكريم الكان معارض وأضافه ود البرعي للجنة دي قال مفصلا :
_ اول حاجة انا بتفق مع كلام سيف الدين دا، وبضيف عليهو الاتي نشوف عدد الأسر الراغبة تسكن معانا منو وعددن كم، وامكانتهم شنو؟ بقدرو يشتروا ما بقدرو …
ونقرر تباع الواطة دي كلها، نعمل بيهم حد مع ناس مبروكة …!
أردف بدر الدين قائلا :
_ نحنا والله مرحبين ومتعاطفين مع النازحين في نفس الوكت عاوزين نحفظ حق اولادنا الشبان القادمين ..!
فأقترح للسيد رئيس اللجنـة إنتداب سيف الدين ، والقمر لجلب معلومات تفصيلية عن الموضوع دا ..
ولابد تدخل كل القروش تخش خزينة لجنة القرية ..!
وهنا أتفق أعضاء اللجنـة كلهم على الموضوع وانتظرنا تقرير سيف الدين والقمر …!
. tofyjpir0@gmail.com
