اسمعني كويس..الناس الماتت قبل دقيقة واحدة بس والله كانت قايلة الموت بعيد..واحد كان بيقول بعد شوية حأقوم اصلي وواحد كان بيقول بكرة حأتصل لأمي أرضيها وواحد كان بيقول الأسبوع الجاي حأبطل الحاجة الحرام دي لكن الموت سبقو الموت ما بدق الباب..الموت ما بعرف صغير ولا كبير ولا بعرف غني ولا فقير ولا بعرف دكتور ولا مريض يجيك فجأة وانت في عز شبابك وفي عز قوتك عاين لي حياتك دي ممكن الليلة تلبس ساعتك الغالية دي وتتباهى بيها قدام الناس وبكرة الوارث يقلعا من يدك وانت بارد في التلاجة. ممكن تقفل باب عربيتك بالريموت وتقول أمنتها وبكرة يجي بتاع الإسعاف يكسرو عشان يطلع جثتك من جوة.. ممكن تقفل زراير جلابيتك ولا بدلتك وانت ماشي تقابل الناس وبكرة المغسل هو اليقلع هدومك حتة حتة ويغسلك وانت ما قادر تحرك يدك.. ممكن الليلة تنوم في سريرك الفخم وتحت المكيف وتغمض عيونك في السقف وانت مطمئن وجمبك مرتك وعيالك وتصحى تلقى روحك في حفرة ضيقة براك لا لمبة لا مكيف لا زول يونسك غير عملك..أهلنا الكبار حكماء قالو كلام دهب.قالو الدنيا ما دايمة لي زول
وقالو الدنيا زي الضل كان كوسو يتعبك وكان خليتو يتبعك.
وقالو
يا ماشي لي بيت الطين
أعمل حسابك بيت الطين ده القبر.. وقالو ساعة القبر ما عندها واسطة وقالو أعمل حساب يوم الحساب.
يا أخوانا القبر أول منازل
الآخرة كان كويس ما بعدو أهون منو وكان كعب ما بعدو أشد منو.. هناك ما في عمارات ولا عربات ولا شركات ولا رصيد في البنك هناك في حفرة يا روضة من رياض الجنة يا حفرة من حفر النار والعياذ بالله..عشان كده قبل ما تندم قوم صلي هسه قبل ما يقولو صلو عليهو..سامح الناس هسه قبل ما يقولو الله يسامحو كان زول كعب رجع حق الناس قبل ما يجي يوم ما عندك جنيه تديهو لي زول غير حسناتك…بر والديك قبل ما تقعد تبكي في قبورهم.. خلي ذكر الله في لسانك طول اليوم.. الدنيا دي كلها زي الحلم.. غمضة عين وتلقى روحك واقف قدام ربنا ويسألك عن الصغيرة والكبيرة.
اللهم انا نسألك حسن الخاتمة.
اللهم توفنا وانت راض عنا تمام الرضا.
اللهم اجعل آخر كلامنا من الدنيا لا اله الا الله محمد رسول الله.
اللهم اجعل قبورنا روضة من رياض الجنة ولا تجعلها حفرة من حفر النار.
اللهم لا تأخذنا الا وانت راض عنا يا أرحم الراحمين.
صباحكم تذكرة ورجوع الى الله
محمدطه محمد عبدالله
