من القلب الي القلب محمد طه محمد عبد الله يكتب رساله مفتوحه الى رئيس مجلس السياده لاسترداد حقوق الشعب وتطبيق القانون على الجميع

السيد القائد البرهان المحترم.
السلام عليكم ورحمة الله وبركاته:_
انا مواطن سوداني بسيط من عامة اهل السودان اكتب ليكم الرساله دي من قلبي ومن وجعنا كلنا على البلد..تابعنا بكل تقدير الاخبار عن بداية مراجعة ومصادرة بعض الممتلكات والشركات التي يقال انها كانت تابعه لال دقلو ونحن نعتبر دي خطوه في الاتجاه الصحيح وخطوه كان منتظرنها الشعب السوداني كلو..نحن مع استرداد اي مال عام يثبت انه تم الحصول عليه بطرق غير قانونيه ومع اعادته لخزينة الدوله بالقانون والمحاكم. ونطالب من سيادتكم بالنظر ومراجعة بعض المشاريع الكبيره التي عليها لغط كثير في الشارع السوداني مثل مشروع امطار في الشماليه الناس بتتكلم عنو كتير عن استهلاكو للمياه الجوفيه وعن عدم استفادة المواطن منو فنطالب بمراجعة عقودو بواسطة لجنه قانونيه متخصصه واذا ثبت ان فيه ضرر على امننا المائي والغذائي نطالب باعادة النظر فيه لمصلحة السودان..وكذلك شركات الذهب الكثيره التي كانت تعمل في فتره الحرب نطالب بمراجعة كل عقودها وتراخيصها ومراجعة انتاجها الحقيقي وهل كانت توريداتها بتصل بنك السودان ولا لا وده كلو بالقانون والمستندات.
وفي نقطه تانيه مهمه
يا سيادة الرئيس
نحن دايرين قانون قوي وواضح يطبق على اي زول ينهب مال البلد او يسيء للوطن او يسيء لقيادة الجيش او يتعاون مع جهات خارجيه ضد السودان مهما كان هو منو.. دايرين قانون يحمي البلد ويحمي جيشنا وما دايرين مجامله لزول على حساب الوطن..ونطالب ان تكون القوانين دي نابعه من ارادتنا السودانيه الخالصه بدون اي ضغوط او املاءات من الخارج لانو ده شأن داخلي يخص سيادتنا نحن ثقتنا فيكم كبيره وثقتنا في قواتنا المسلحه كبيره وعارفين الضغوط العليكم لكن الشعب كلو واقف معاكم..نحن دايرين سودان القانون سودان العداله سودان البشيل حق الضعيف من القوي بالقانون ده رأيي كمواطن سوداني بحب بلدو واتمنى انو يصل ليكم بصدر رحب.وربنا يحفظ السودان وجيش السودان وشعب السودان.
جيش واحد شعب واحد
محمدطه محمد عبدالله