من القلب الي القلب محمد طه محمد عبد الله يكتب ميدان كرري يستحق ميدان نضيف والبرعم يستحق أمان. رساله لوالي الخرطوم وللمدير التنفيذي لمحلية كرري..

يا والي الخرطوم يا المدير التنفيذي لمحلية كرري.
السلام عليكم ورحمة الله وبركاته:_
الرساله دي ليكم انتو بس رساله مرتبه وبالواضح كدا عن ما حدث في ميدان البراعم في كرري..
ما حدث
تابعت عبر قناة الخرطوم الفضائيه دورة المدير التنفيذي للبراعم بمحلية كرري تابعتها بعيني وسمعتها بأذني وشفت المشهد كامل.
المشهد الأول
الكلاب الضاله داخل الميدان مكونين فريق رياضي بالواضح كدا فريق كامل بيلعب جوه الميدان وسط البراعم.. البراعم بيلعبو كوره والكلاب بتجري معاهم البراعم بيجرو ورا الكوره والكلاب بتجري وراهم البراعم خايفين والكلاب مرتاحه كأنو الميدان حقها وكأنو البراعم هم الضيوف.
المشهد الثاني
الغبار والحجاره الغبار مالي الميدان والحجاره ماليه الميدان..الطفل بيقع في الحجاره..والطفل بيتنفس الغبار والطفل بيخاف من الكلب..دي ما بيئه رياضه دي ما بيئه براعم..دي بيئه خطر.
الحضور
والغريب في الأمر الحضور من كافة المسئولين حضور وزير الثقافه بولاية الخرطوم الأستاذ الطيب سعد الدين حاضر بنفسو وحضور مدير شرطة محلية كرري حاضر بنفسو وحضور المدير التنفيذي حاضر بنفسو وحضور مسئول هيئة البراعم حاضر بنفسو وحضور مديرة الملاعب الأستاذه أميره الفادني حاضره بنفسها وحضور قناة الخرطوم الفضائيه حاضره بتصور وبتوثق وبتنقل الحدث لكل السودان وحضور إعلاميين وحضور جمهور المنصه مليانه الكراسي مليانه الكاميرات شغاله.
كل المسئولين حاضرين
والكلاب حاضره والغبار حاضر والحجاره حاضره
والبراعم حاضرين لكن النظافه غايبه والأمان غايب والترتيب غايب
والقرار غايب.كل المسئولين شافو الكلاب جوه الميدان
وما في زول قام وما في زول اتحرك وما في زول قال وقفوا المباراه.طلعوا الكلاب..نضفوا الميدان أمنوا الأطفال…قناة الخرطوم نقلت الصوره لكل بيت..الأم شافت والأب شاف والجد شاف كلهم شافو الكلاب جوه ميدان البراعم والمسئولين قاعدين يتفرجو..حقيقة تذكرت أبو هريره رحمة الله عليه أبو هريره كان رحيم بالحيوان كان يحب القطط وكان يعطف عليها..لكن أبو هريره
ما كان بيخلي الكلب الضال يعض طفل وما كان بيخلي الحيوان يخوف الإنسان الرحمه بالحيوان ما معناها
نخلي الطفل في خطر
الرحمه بالحيوان معناها نحمي الحيوان ونحمي الإنسان الاثنين مع بعض..
الخطر يا والي الخرطوم يا المدير التنفيذي لو طفل واحد اتعضى قدام الكاميرا وقدام وزير الثقافه وقدام مدير الشرطه وقدام المدير التنفيذي وقدام قناة الخرطوم كان الحيحصل شنو كان منو حيتحمل المسئوليه..كان حنقول شنو لأمو كان حنقول شنو لأبوهو..لو طفل اتكسرت رجلو في حجاره منو المسئول لو طفل جاتو حساسيه من الغبار منو المسئول لو طفل خاف وبطل كوره منو الخسران.. الخسران هو السودان
رساله لوالي الخرطوم
يا والي الخرطوم انت المسئول الأول عن الخرطوم عن أمنها عن نظافتها عن أطفالها عن ميادينها..
يا والي الخرطوم
المسئولين الحضرو الدوره كلهم تحت مسئوليتك والمدير التنفيذي ومدير الشرطه ووزير الثقافه ومسئول البراعم ومديرة الملاعب كلهم تحت توجيهك..
يا والي الخرطوم
نحن ما بنقول المسئولين ما جو نحن بنقول المسئولين جو لكن ما عملو نحن ما بنقول المسئولين ما شافو نحن بنقول المسئولين شافو لكن ما اتحركو..
يا والي الخرطوم
وجه توجيه واضح أي ميدان براعم في الخرطوم لازم يكون نضيف ولازم يكون آمن ولازم يكون مسور ولازم يكون فيهو بوابه ولازم يكون فيهو حارس ولازم يكون فيهو إسعاف ولازم يكون فيهو مويه نضيفه..ولازم يكون فيهو حمام نضيف..
يا والي الخرطوم
وجه بإخراج الكلاب الضاله من كل ميادين البراعم بطريقه إنسانيه من غير قتل ومن غير تعذيب وديها لمكان رعايه وعالجها وأمنها.
يا والي الخرطوم
وجه بتنظيف ميدان كرري من الغبار والحجاره وفرشو
وسورو وأمنو وخليهو نموذج لكل ميادين السودان.
رساله للمدير التنفيذي
يا المدير التنفيذي لمحلية كرري الدوره دي باسمك دورة المدير التنفيذي يعني انت صاحب الدوره وانت المسئول عنها وانت المسئول عن ميدانها وانت المسئول عن نظافتها وانت المسئول عن أمانها.
يا المدير التنفيذي
قبل ما البراعم يدخلو الميدان كان المفروض انت تكون في الميدان قبلهم
تفتش الميدان وتطلع الكلاب بطريقه إنسانيه وتنضف الغبار وتشيل الحجاره وتجهز الميدان للأطفال.
يا المدير التنفيذي
المدير ما هو كرسي في المنصه..المدير ما هو خطاب..المدير ما هو تصوير..المدير هو فعل المدير هو إنو يشوف الميدان قبل الدوره ويصلحو قبل ما الأطفال يدخلو.
يا المدير التنفيذي
البراعم ديل أطفال
البراعم ديل أمانه في رقبتك البرعم لو اتعضى انت المسئول البرعم لو اتكسر انت المسئول.
رساله لوزير الثقافه ومديرة الملاعب ومسئول البراعم يا أستاذ الطيب سعد الدين يا وزير الثقافه بولاية الخرطوم انت وزير ثقافه.. والثقافه هي النظافه والثقافه هي الترتيب والثقافه هي احترام الطفل والثقافه هي حماية البراعم..الثقافه ما هي خطاب في منصه
الثقافه هي ميدان نضيف الثقافه هي طفل آمن الثقافه هي كلب بعيد من الميدان.
يا أستاذه أميره الفادني
يا مديرة الملاعب انت مديرة الملاعب الملعب مسئوليتك الملعب هو شغلك الملعب هو مكتبك
الملعب هو عنوانك الملعب لو كان نضيف الناس حتقول مديرة الملاعب شغاله والملعب لو كان وسخان الناس حتقول مديرة الملاعب وين المديره ما هي كرسي في المنصه المديره هي فعل..المديره هي إنها تشوف الميدان قبل الدوره..وتتأكد إنو الميدان نضيف وإنو الميدان آمن..
يا مسئول هيئة البراعم
البراعم ديل هم مستقبل السودان البراعم ديل هم. جيش السودان الجاي
البراعم ديل هم أطباء السودان الجايين البراعم ديل هم معلمين السودان الجايين..البراعم ما دايرين كلام.. البراعم دايرين فعل.. البراعم دايرين ميدان نضيف البراعم دايرين كوره نضيفه..البراعم دايرين مدرب يحترمهم البراعم دايرين مسئول يحميهم.
الخلاصه
يا والي الخرطوم يا المدير التنفيذي الدوره نجحت إعلاميا لكن فشلت ميدانيا لأنو الميدان كان فيهو فريقين فريق البراعم وفريق الكلاب الضاله والفريق التاني كان أقوى لأنو ما في زول وقفو..
يا والي الخرطوم
يا المدير التنفيذي ابدأو من كرري ابدأو من الميدان الشفتو في الفضائيه نضفوهو سوروهو أمنوهو وخليهوهو نموذج لكل ميادين السودان عشان الطفل في كرري وفي أم درمان وفي بحري وفي كل السودان يلعب وهو آمن ويلعب وهو فرحان ويلعب وهو حاسس إنو بلدو بتحبو وبتحميهو..الحضور ما هو الكراسي الحضور ما هو التصويرالحضور ما هو الخطاب الحضور هو الفعل..الحضور هو إنك تشوف الغلط وتصلحو في نفس اللحظه.
محمدطه محمد عبدالله