من القلب الي القلب محمد طه محمد عبد الله يكتب : رسالة لعموم أهل السودان من واقع هذا الشعر الرضين المقفي من الشاعر الوطني الغيور الدكتور العزيز الحبيب عمر محمود خالد

الدكتور يسال فيه الوطن
يا بلد أصبحتا كيف وكيف عيونك من وجع سهر الليالي الحايرة في الصيف والخريف تسلم انتا من المصاعب والمتاعب والجراحات والنزيف..
تفصيل هذه الرسالة الوطنيه
يا بلد أصبحتا كيف نحنا بنسألك السؤال ده..كل يوم كل صباح كل ليلة ما سؤال عابر..ده سؤال ولد لأمو سؤال زول مشتاق لبلدو سؤال زول خايف على بلدو.
أصبحتا كيف يا بلد
وانت بعيد عننا ونحنا بعيدين عنك..أصبحتا كيف وانت شايل هم أولادك في كل بيت..في كل شارع في كل مدينة…وكيف عيونك من وجع سهر الليالي الحايرة عيونك يا بلد ما نامت عيونك سهرانة معانا.. سهرانة مع الأم البتفتش لي ولدها سهرانة مع الأبو البفتش لي لقمة عيش لأولادو..سهرانة مع البت البتفتش لي أمان..سهرانة مع الولد البفتش لمستقبل عيونك..حايرة يابلد حايرة زي لياليك. ليالي ما عارفة ترسى على شنو..لا الصيف ريحها لا الخريف ريحها..في الصيف كنا بنقول الخريف جاي والخريف بيجيب المطر والخريف بيجيب الخير وفي الخريف بقينا نقول الصيف جايي والصيف بيجيب النشفان والصيف بيجيب التعب وبقينا حايرين حايرين بين صيف وخريف حايرين بين حرب وسلام حايرين بين فراق ورجوع حايرين بين بكاء وضحك تسلم انتا من المصاعب يا بلد المصاعب الكتيرة الجاتك..جاتك من بره وجاتك من جوه جاتك من حرب وجاتك من فتنة وجاتك من فرقة وجاتك من أولادك قبل أعداءك..
لكن بنقول ليك تسلم تسلم
لأنك لسه واقفة ولسه صامدة ولسه شايلة اسم السودان.تسلم انتا من المتاعب..من التعب المشى في بيوتك في مدارس في مستشفيات في شوارعك في قلوب ناسك تعب الزول الما لاقي علاج تعب الزول الما لاقي تعليم لأولادو.. تعب الزول الما لاقي بيت يأويهو..تعب الزول الما لاقي وطن يحميهو..تسلم انتا من الجراحات..من الجرح الاتفتح في كل بيت..في بيت فقد ولدو..في بيت فقد أبو..في بيت فقد أمو..في بيت فقد بيتو..في بيت فقد وطنو وهو جوه وطنو..جرح ما بيتخيط بي خيط بيتخيط بي محبة وبيتخيط بي وحدة وبيتخيط بي صدق..
تسلم انتا من النزيف من
الدم السال من غير ذنب..دم أولاد صغار ما عرفو الدنيا دم أمهات ما عملو غير إنهم ربو أولادهم..دم آباء ما عملو غير إنهم دايرين يعيشو بكرامة دم شباب كان حلمهم يبنو بلدهم.ولقو نفسهم بيموتو فيها.
يا أهل السودان الرسالة
دي ما شعر بس الرسالة دي وجعنا كلو..ونحنا بنقول ليكم..ما تخلونا نتفرق..ما تخلونا نقول ده شمالي وده جنوبي وده شرقي وده غربي..نحنا كلنا أولاد بلد واحدة. وكلنا موجوعين نفس الوجع..وكلنا سهرانين نفس السهر..وكلنا حايرين نفس الحيرة.
يا أهل السودان البلد دي
أمانتنا والأمانة ما بتتقسم.. الأمانة بتتحفظ باليد الواحدة وبالقلب الواحد وبالكلمة الواحدة..لو اتوحدنا بنبقى نار على العدو ونور لأولادنا.لو اتفرقنا بنبقى وجع على بعض ونزيف ما بيقيف..
يا بلد أصبحتا كيف
أصبحتي طيبة لأنك لسه فينا ولسه بنحبك ولسه ما بعناك ولسه راجعين ليك تسلم انتا يا بلد..تسلم ونرجع ليك نبنيك من جديد نبنيك بي دموعنا..وبعرقنا وبدمنا وبحبنا..
يا أهل السودان خلو يدكم
واحدة وقلبكم واحد وكلمتكم واحدة وخلو بلدكم معاكم ما ضدكم.
محمدطه محمد عبدالله