من القلب الي القلب محمد طه محمد عبد الله يكتب (أن تكن أنت بعيدا في الثرى فخيال الشعر يرتاد الثريا) . مقالي اليوم اقتبسته من الأبيات أعلاه بعيد في الثرى وخيالك في الثريا.
رسالة لعموم أهل السودان
يا عموم أهل السودان من الشمال للجنوب ومن الشرق للغرب ومن المدن والقرى والبوادي ومن جوه السودان ومن بره السودان رسالتي ليكم الليلة من بيت شعر واحد لكن شايل كل وجعنا وكل أملنا..
أن تكن أنت بعيدا في الثرى
فخيال الشعر يرتاد الثريا..
البيت أعلاه ما شعر ساكت البيت ده حالنا نحن الليلة فينا..البعيد بجسدو وفينا البعيد بقبرو وفينا البعيد بغربتو وفينا البعيد بنزوحو لكن رغم كل البعد ده خيالنا وقلوبنا وأرواحنا لسه فوق لسه في الثريا لسه ما انكسرت..
ناسنا الصاروا في الثرى
شهداءنا الدفناهم بيدينا وبكينا عليهم ودعينا ليهم ديل ما راحوا ساكت ديل في الثرى بجسدهم لكن ذكراهم في الثريا اسمهم عالي وروحهم حية وقصتهم ما بتموت الشهيد في الخرطوم والشهيد في الفاشر والشهيد في الجزيرة والشهيد في كردفان والشهيد في دارفور ديل ما ماتوا ديل هم الأساس البنبني عليهو السودان الجديد ديل دفعوا دمهم عشان نحن نعيش وعشان أولادنا يعيشوا وعشان الوطن يعيش فما تبكوا عليهم بكاء اليأس ابكوا عليهم بكاء الفخر وقولوا لأولادكم ديل أعمامكم وديل خيلانكم وديل إخوانكم ديل هم الثريا الحقيقية ديل هم النجوم البتنور لينا الطريق في عز الظلام.
وناسنا البعيدين في الغربة في
جدة والرياض والقاهرة ولندن وأمريكا وكل الدنيا انتو بعيدين بالمسافة لكن قريبين بالقلب انتو بعيدين في ثرى غريب لكن خيالكم كل يوم في السودان في بيتكم وفي حوشكم وفي شارعكم وفي أهلكم نحن عارفين وجعكم وعارفين إنكم بتنوموا وتصحوا على أخبار الحرب وبتدعوا لأهلكم وبتحولوا قروشكم وبتشيلوا هم أهلكم أكتر من هم نفسكم وده هو. *السوداني الأصيل البعيد بجسد
ولكن قريبو بروحو ما تقولوا نحن بعيدين وما بنقدر نعمل شي انتو بتعملوا الكتير بدعائكم وبمالكم وبوقفتكم وبكلمتكم وبتربيتكم لأولادكم على حب السودان ودي براها ثريا..
وناسنا البعيدين في النزوح
يا نازحين يا من خليتوا بيوتكم وذكرياتكم وطلعتوا بشنطة واحدة وبقيتوا بعيدين عن بيوتكم انتو برضو خيالكم في الثريا بيتكم ما هو الحيط بيتكم هو كرامتكم ووطنكم ما هو العنوان وطنكم هو قلوبكم انتو ما ضعاف انتو أقوى ناس لأنكم صبرتوا على الجوع والعطش والحر والبرد وما بعتوا كرامتكم وما بعتوا وطنكم انتو علمتونا معنى الصبر ومعنى التعاضد ومعنى إنو السوداني وين ما مشى رافع راسو..
با أهل السودان جميعا البيت
أعلاه بيقول لينا البعد ما بيقتلنا والثرى ما بيدفننا والغربة ما بتنسينا والنزوح ما بيكسرنا نحن شعب خيالو في الثريا يعني أحلامو كبيرة وهمتو عالية وطموحو فوق السحاب العدو دايرنا نعاين للتراب ونقول انتهينا لكن نحن بنعاين للثريا وبنقول لسه بدينا العدو دايرنا نتفرق ونحن بنقول حنتلم العدو دايرنا ننسى شهداءنا ونحن بنقول ذكراهم في الثريا.
عشان كده يا عموم أهل
السودان اتوحدوا واتعاضدوا واغسلوا قلوبكم وأمسكوا في إبهامكم واترحموا على شهداءكم واتفقدوا نازحيكم وادعوا لمغتربيكم وحافظوا على جيشكم وحافظوا على وطنكم وخلوا خيالكم دايما في الثريا يعني ما ترضوا بالذل وما ترضوا بالهزيمة وما ترضوا بالفرقة ارفعوا راسكم وقولوا نحن. *سودانيين نحن أولاد الثرى والثريا
نحن من التراب بنقوم وللنجوم بنصعد وحيجي اليوم البنرجع فيه كلنا البعيد والقريب والنازح والمغترب وحنتلاقى في أرض واحدة وحنبني السودان من تاني وحنقول للعالم كلو رغم الثرى وصلنا الثريا.
ختاما الخلاصة
أن تكن أنت بعيدا في الثرى فخيال الشعر يرتاد الثريا يعني جسدنا في الأرض لكن روحنا في السماء وحبنا للسودان ما بيموت ولا بيندفن ولا بيتباع.
محمدطه محمد عبدالله
