من القلب الي القلب محمد طه محمد عبد الله يكتب رسالة قوية الي رئيس مجلس السياده ونوابه والقضاة والجهاز العدلي في الدوله المحرره من الاوباش والعملاء

بعد الحرب التحقيق
الشفاف هو طريق العدالة وليس التشفي.
يا أهل السودان الكلام
ده حساس والكلام ده مهم والكلام ده لازم نقولو بصدق وبدون ظلم وبدون تشفي وبدون تعميم.
بعد الحرب دي في بنية
تحتية اتكسرت وفي كهرباء اتقطعت وفي محطات اتخربت وفي بيوت اتسرقت وفي ناس اتضررت وفي ناس طلعت من بيوتها وهي مجروحة وفي ناس قعدت وهي مجروحة والوجع ده وجعنا كلنا وما في زول فينا ما اتوجع..لكن يا جماعة الظلم ما بيعالج الظلم والتعميم ما بيبني وطن وما في شعب كامل بيكون مجرم وما في شعب كامل بيكون ملاك الحقيقة محتاجة تحقيق والعدالة محتاجة قانون والقانون محتاج ناس مخلصين وناس نضاف وناس بخافوا الله.
نحن بنطالب يتحقيق
شفاف وتحقيق شامل وتحقيق عادل في كل حاجة حصلت منو الكسر ومنو السرّق ومنو ساعد ومنو فتح تكاية عشان يغطي علي الحرامية ومنو استغل الحرب عشان ينهب ومنو باع ضميرو ومنو خان أهلو ومنو خان وطنو
مع العلم والدرايه التامه
بان هؤلاء الأوباش لا يعرفو كل ذلك الخراب الحاصل في البنيات الاساسيه لجهلهم وإنما هناك من كان يساعدهم..
يا جماعة لازم نفهم الحقيقة دي
كويس هؤلاء الأوباش براهم ما بيعرفو حاجة هؤلاء الأوباش براهم ما بيفهمو حاجة في الشغل الفني ده كان في ناس بتساعدهم وكان في ناس بتوجههم وكان في ناس بتخطط ليهم وكان في ناس بتوريهم يعملوا شنو ويمشوا وين ويكسروا شنو ويسرقوا شنو..
إيه العرف الغبي المليشي بسرقة
زيوت المحولات إلا يكون خبير يعمل في مجال الصيانة والكهرباء..يا جماعة فكروا معاي بالعقل مليشي جاهل ما بعرف يفك مسمار كيف عرف إنو جوه المحول في زيت غالي وكيف عرف يفك المحول وكيف عرف يفرغ الزيت وكيف عرف يتعامل مع الكهرباء بدون ما يموت إلا يكون معاهو خبير شغال في مجال الصيانة والكهرباء إلا يكون معاهو زول فاهم الشغل ده من جوه إلا يكون معاهو زول كان شغال في الهيئة ولا في الشركة ولا في المحطة وبيعرف كل صغيرة وكبيرة من أين أتو بالحفارات وأين ذهبت
كلها تساؤلات وتحقيقات.
يا جماعة الحفارات دي ما حاجة بتتشال في الجيب ولا بتتسرق في ليلة الحفارات دي معدات تقيلة ومعدات غالية ومعدات معروفة منو الجابها ومنو ساقها ومنو وصلها للمحطات ومنو شغلها ومنو ودى الزيت وين وودى النحاس وين وودى الكيبلات وين وودى المحولات وين.
كلها تساؤلات وكلها محتاجة
تحقيقات وكلها محتاجة أدلة وكلها محتاجة قانون.
والمحرك والشارك قلبو
خفيف بالضغط والتحقيق بيفك أخرو يا جماعة المجرم الحقيقي قلبو ما قوي والمحرك والشارك قلبو خفيف وبالضغط والتحقيق بيفك أخرو وبيتكلم وبيقول منو كان معاهو ومنو كان بيأمرو ومنو كان بيديهو القروش ومنو كان بيستلم البضاعة المسروقة عشان كده التحقيق لازم يكون ضاغط وتحقيق لازم يكون ذكي وتحقيق لازم يكون مهني وما يستعجل وما يظلم وما يفوت خيط واحد..
التحقيق ده لازم يكون
بلجان نزيهة ولجان سرية ولجان مهنية ولجان بعيدة من التدخل وبعيدة من الضغوط وبعيدة من المجاملة لا كبير فوق القانون ولا صغير فوق القانون…القانون فوق الجميع والقاضي لازم يكون نضيف والمحقق لازم يكون نضيف والمحامي لازم يكون نضيف لأنو لو القاضي فاسد والتحقيق فاسد العدالة كلها بتضيع
ونحن بنقول أي زول ثبت
عليهو بالدليل وبالقانون إنو شارك في تكسير البلد أو سرقة بيوت الناس أو التعاون مع الدعامة أو نهب حق الناس يتعاقب بالقانون ويتحاكم قدام الناس وبدون تدخل وبدون واسطة وبدون محسوبية..
وأي خبير باع علمو وأي
فني باع ضميرو وأي مهندس باع شرفو عشان يساعد المليشيا لازم يتحاسب حساب مضاعف لأنو خيانة المتعلم أخطر من جهل الجاهل..
وفي نفس الوقت أي زول
بريء وما عمل حاجة لازم نحميهو ولازم نحترمو ولازم ما نظلمو لأنو الظلم بالجملة بيعمل فتنة جديدة والتشفي بيعمل حرب جديدة والاتهام بدون دليل بيعمل كراهية جديدة ونحن ما دايرين حرب جديدة نحن دايرين وطن جديد.
يا أهل السودان الشعب
السوداني ده فيهو الشريف وفيهو الخاين فيهو الصادق وفيهو الكذاب فيهو البني وفيهو الهدم ما ممكن نخت الكل في سلة واحدة لازم نفرز بالدليل وبالقانون وبالعدالة ولازم كل زول ياخد حقو بالقانون لا زيادة ولا نقصان..
*يا والي ويا حكومة ويا قضاء*
ويا نيابة ويا شرطة دوركم الليلة أكبر من أي يوم دوركم إنكم ترجعوا الثقة للناس وترجعوا الحق لأهلو وترجعوا البلد للقانون لو القانون مشى صاح البلد حتمشي صاح ولو القانون اتكسر البلد كلها حتتكسر..
يا أهل السودان تعالوا
نبني بعد الحرب دي باحترام وبعدالة وبي صلات صادقة وبتربية وطنية تعلم أولادنا إنو السوداني أخو السوداني وإنو السرقة حرام وإنو الخيانة حرام وإنو التعاون مع المجرم جريمة وإنو السكوت عن الحق ما رجولة وإنو قول الحق هو الرجولة.
ختاما الخلاصة
نحن ما دايرين انتقام نحن دايرين عدالة وما دايرين فوضى نحن دايرين قانون وما دايرين تعميم نحن دايرين تحقيق نزيه يحاسب المجرم الحقيقي والمحرك والمساعد والخبير الخاين ويحمي البريء ويحفظ السودان ويوحد السودان.
السودان أولا والسودان أخيرا والسودان فوق الجميع والعدالة هي الأساس والاحترام بيناتنا هو الوطنية.
وصلي اللهم علي سيدنا محمد
وعلى آله وصحبه وسلم تسليما كثيرا.
اللهم احفظ السودان وأهل السودان.. اللهم انصر القوات المسلحة السودانية
اللهم ارحم شهداءنا واشف جرحانا ورد غائبنا سالما..
اللهم عليك بالدعم السريع والإمارات ومن عاونهم فإنهم لا يعجزونك.
محمدطه محمد عبدالله