من القلب الي القلب محمد طه محمد عبد الله يكتب رسالة واضحة لعثمان مرغني من واقع تسجيل ام وضاح.

يا عثمان يا مرغني الشعب السوداني سمع كلامك في التلفزيون وانت بتقول للشعب اقيف وانتظر وانت بتتكلم عن رجال البلد والسياسيين والشعب بيسأل سؤال واضح منو رجال البلد البتقصدهم؟ وهل الشعب مفروض ينتظر منو؟ الشعب شاف تسجيل ام وضاح وهي بتقول الرجال الحقيقيين ما في الاستديوهات الرجال الحقيقيين في النيل الأزرق في كردفان في الخطوط الأماميه في الخنادق في الميدان..والشعب وافق علي كلامها لأنو شاف الجيش هو الحرر التلفزيون وهو الحرر الخرطوم وهو الحرر المؤسسات.نحن هنا ما بنتهم زول ولا بنجرم زول نحن بنعرض كلام ظهر في الإعلام وبنسأل اسئله مشروعه من حق أي مواطن يسألها..ليه كان الحديث عن الحرب العبثيه اكتر من الحديث عن جرائم المليشيا ليه كان صوت الدانه متأخر وضعيف عند كتير من السياسيين والاعلاميين..ليه كان الحديث عن الحوار قبل الحديث عن تحرير البلد الشعب سمع مطالبات في الاعلام بوقف دعم الجيش وبحظر الطيران والشعب سأل لو اتنفذ الكلام ده الجيش حيدافع كيف؟والبلد حتتحرر كيف؟ والمواطن حيرجع بيتو كيف؟انت جيت راجع الخرطوم وقعدت في التلفزيون والتلفزيون ده حررو الجيش بدمو..والكرسي اللي قعدت فيهو جابوه اولاد الجيش بتضحياتهم والشعب شاف المشهد ده وسأل..هل الكلام كان علي قدر التضحيه دي..يا عثمان مرغني؟ الشعب السوداني ما واقف..الشعب السوداني صابر ومقاتل ومدافع عن ارضو وعرضو وبلدو الشعب ما محتاج وصايه ولا محتاج انتظار..الشعب محتاج كلام واضح وموقف واضح مع الجيش ومع الشهداء ومع الناس الفقدت بيوتها وأولادها..رجال البلد عند الشعب هم الجيش هم المستنفرين هم المقاومه هم الشعب..ديل اللي قدموا الدم.وديل اللي رجعوا الناس لبيوتهم. وديل اللي بيقرروا مصير البلد بتضحياتهم ما بكلامهم..دي ما شتيمه دي ما تهمه دي قراءه في مواقف اعلاميه ونقد سياسي ورأي وسؤال مشروع. والشعب هو اللي يحكم.
محمد طه محمد عبدالله








