محمد غبوش يكتب :
بطولتنا ما باللائحة.. بالصايحة
حبايبنا (المريخاب) بعد تأكيد صدارة أبو الهل للدوري الموريتاني وحصولة رسمياً على لقب (سيد البلدين) الصبر غلبهم.. وحالتهم بقت تحنن الكافر ..
قالوا شنو.. ؟
قالوا.. أن (مسؤول الإتحادات الوطنية) بالإتحاد الموريتاني جدو بنان قال ليهم : مسألة إعتبار النادي السوداني الأعلى في الترتيب بطلاً على الآخر كانت مجرد مقترح من جانبنا ولم يرد الإتحاد السوداني بالموافقة عليها، لذا لم تضمن في اللائحة الوطنية الخاصة بالمسابقات..
أي والله.. ده آخر ما طلعوا بيهو.. عشان يواصلوا (غش) في جماهيرهم.. ويداروا (فضيحتهم المجلجلة الدولية) وهم يحصلون على لقب (ملطشة) الدوري الموريتاني..
المهم.. نحن ما منتظرين منكم (إعتراف).. ولا لائحة..
#يكفينا فقط.. الثكلي وقومة النفس والنائحة التي تتحفونا بهم حالياً.. للهروب من واقع مؤلم جداً بالنسبة لكم.. ومفرح لنا..
حلاوة بطولاتنا ما بتحتاج (اللائحة) .. فحلاوتها تكفينا فيها (الصايحة) التي نتابعها منكم.. و(الفايحة) عبر حروفكم وكتاباتكم.. و(النايحة) على خيبتكم حتي في موريتانيا..
#بالمناسبة.. نحن لسة طالبنكم تهنئة ببطولتنا عليكم الحالية.. ولو ما هنيتونا سريع.. بنردها ليكم (بالمثل) ..
لا دقيقة.. عشان ما تحلموا كتير بعد (بالمثل) دي وتفتكروها بعد تصدركم لي بطولة.. بالمثل يعني مثلاً السنة الجاية تنجحوا في تخطي التمهيدي..
مثلاً.. قلنا مثلاً يعني..
دقيقة تاني.. هو ذاتو.. فريق (ملطشة) في موريتانيا البوديهو يلعب في الأبطال شنو.. ؟
ما (صحبة راكب) كالعادة مع أصحاب السيادة..
*وبس*
(غبوش)
