سعادة الفريق ياسر العطا
السلام عليكم ورحمة الله تعالي وبركاته:_
انا واحد من اخوانك الحريصين علي الوطن وشعبه وقواته المسلحه ومكتسباته وداير اقول ليك كلام في موضوع المنشقين الجايين من المليشيا ديل.يا سعادتك نحن ما ضد انو الزول يرجع لي صوابو لكن البنخاف منو انو الجماعة ديل قعدو مع المليشيا سنتين كاملات شافو وشاركو في الحاصل ده كلو ما معقول بين يوم وليلة يبقى قلبو ابيض و يبقى معانا..عشان كده بنقول ليك يا العطا الحذر واجب الزول الجاي من هناك ده *اول حاجة* لازم يتفرز كويس استخباراتنا تشوفو كويس كان وين؟ بقاتل مع منو؟ تلفونو فيهو شنو؟ لسه بتواصل مع ناسو القدام ولا لا ؟ *تاني* حاجة يا سعادتك ما تديهو سر نهائي لا توريهو متحرك ماشي وين لا ارتكاز وين..خليهو بعيد من المعلومات..*تالت* حاجة ودي الأهم خلوهم في معسكر براهم فترة كده ما طوالي يخشو جوه الجيش وبعداك لو دايرين تثبتوهم. خلوهم قدام.. قدام عديل في الشغل..لو صادق بخلي جماعتو وبقاتل معانا وبثبت بي دمو ولو ما صادق بنكشف براهو قبل ما يضر اخواننا..يا سعادتك الجيش ده ما عندنا غيرو ولو دخلت فيهو خلية واحدة نايمة بي اسم منشق ممكن تضيع تعب شهور نحن واثقين فيكم وفي شغل الاستخبارات العسكرية لكن وجب التنبيه.
ربنا يحفظكم وينصركم.
وده رأي شخصي مني ولا يمثل اي جهة ولا فيهو اتهام لي زول معين مجرد ملاحظة لاخواننا في الجيش.
المواطن/
محمدطه محمد عبدالله
