زاوية خضراء
داؤد ابوكلام داؤد يكتب :
سعادة الكباشي (وطنكو ٠٠ برانكو )
طبعاً رغم أننا من منطقة واحدة ومحلية واحدة بهبيلا بجنوب كردفان مع سعادة الفريق الكباشي. وأخوه المهندس الكيميائي الموجود الأن بدولة كندا.. صلاح الدين كباشي من أصدق أصدقائي وأحبابي إلتقيته بعد ثلاثين عاماً عند زيارة الكباشي للدلنج وفطرنا في صينية واحدة بمنزل المك/حسن جبر الدار حيث اقام وليمة للكباشي .
صلاح كباشي علمني كيف أكون مفتح وشفت في القاهرة عندما زرت مصر لأول مره ورسم لي خارطة طريق للحياة في القاهرة وكان ذلك في بداية تسعينات القرن الماضي.؟
وسكنت معه في شقة واحدة مع اصدقاءه إبراهيم ريحان من حي القلعة بالابيض وماهر من ابناء الريف بالفاشر بدارفور لا أدري أين هم الان ؟؟؟
كان ذلك في حي منشية البكري بمنطقة محطة بن سندر للمترو .حيث أتهم فيها الإخوان المسلمون بإغتيال جمال عبدالناصر وبعدها أعدم معظم القيادات الكبيرة في مصر. لم التقى الكباشي مباشرةً في حياتي إلا مره واحده في الدلنج وكنت مقدم لبرنامج للإدارة الأهلية داخل قيادة اللواء عند زيارته للدلنج في العام ٢٠٢٣ بحضور وزير الحكم الاتحادي/مهندس محمد كرتكيلا صالح والوالي/موسي جبر محمود وكتبنا عن هذه الزياره زاوية خضراء بعنوان (الكباشي وصدي الزيارة ) وأذكر من الزملاء الصحفيين فى هذه الرحلة لجنوب كردفان وجبال النوبا بكري المدني واسامة عبد الماجد ورشا اوشان ويوسف عبدالمنان وآخرين كثر.
وكتبت مره أخرى عن زيارته للنيل الأبيض تحت عنوان (الكباشي وتماسيح النيل الابيض) وكتبت عنه مره ثالثة وهذه هي المرة الرابعة أكتب عنة تقريباًِ. وطبعاً شقيقي ناصر أبوكلام .. سمي ولده البكر شمس الدين كباشي.. في مره من المرات انا جاي داخل البيت في البلد لقيتو في ظل المخزن في الحوش قاعد براهو وهو صغير عمره تقريبا ثلاثة سنوات ( لقيته قاعد في كرسي صغير عريان كما ولدته أمه وخالف رجل علي رجل وشايل عصاية في يده وينظر هناااك في الأفق البعيد .؟؟!!!
قلت يا ساتر الكباشي قاعد عريان وفي النقعه ومته من الضحك ههههه) الله يستر لقدااام الكباشي ود اخوي ده كن جاء حاكم للسودان. ؟؟؟
عموما جاتني هذه الخواطر في شريط سريع لما رأيت أمس الفريق الكباشي سيد الإسم بشحمه ولحمه وفي كامل زيه العسكري عكس العريان زولي دااااك.؟؟
وكان الكباشي كلامه أمام ولاة ولايات السودان ببورتسودان ( كلام بره وعريان ما لابس كمامه.) قال تاني ما داير أي وفد يجي هنا في بورتسودان (والكلام ليك يالمنطط عينيك خلو تدفرو.. وفد تلو الوفد وتفضوا الولايات من المزعجيين السياسيين ) وقال نحن همنا الأمن والأمن اساس التنمية والإستقرار لكل الناس وقال هم يعملون في تعزيز الامن وطمن الشعب السوداني بأن الأمور تسير نحو الجيد بإذن الله.
ياسعادة الكباشي نقول لك بلغتنا النوبيا الكوشية الجميلة (شنن ..شنن..وطنكو….برانكو. ) يا ناس برانكو خلو بالكم يا ناس شرق الجزيرة والشرفة أخي حسين خوجلي. وأحمد الشريف ؟
ندخل الترجمة شنن. شنن برااااحة. . برااااحة وطنكو. شوية…شوية وبرانكو في الفجر والصباح الباكر ولكن ياسعادة الكباشي تقول للوفود نهاراً جهاراً وفي التلفزيون وأمام كل ولاة ولايات السودان تاني ما داير وفد يجي بورتسودان.. لا لا فعلا ود اخوي ناصر أبوكلام إسمه الكباشي.. اسم علي مسمي؟!
والله انا ذاتي خجلته قربت أنزل أخش تحت السرير. ؟؟ كلام جيش ناشف كرررر.!!! الحمد لله انا حتي الآن لم تحدثني نفسي بالذهاب الي بورتسودان. واحد من الناس قال لي يالمك أنت لازم وضروري تمشي بورتسودان أنت زول صحفي ومك..قلت له انا ده ..بري. بري..بري.. عشان يقولوا المك بقي شحاد. أمام أبواب العساكر والوزراء والمنظمات. ؟؟؟
افو.. افو…افو… حاشا وكلا حتي لو نقغد ناكل الغله بليلة في الحله..؟؟؟؟ نحن عزة السودان ومجده وفخره نحن ملوك النيل وعظماء التاريخ. ؟؟؟ ونقول لسعادة الكباشي ( بيل.. آ.. طقي ) الترجمة من النوبيا يعني الله يخليك ويحفظك. ؟؟؟
ونقول للناس القاعدة في بورتسودان من الوفود شغله بلا شغله. ؟ أحسن ليكم بقجوا بدري..بدري. قبل ما يقوم عليكم سعادة الكباشي النصيحة حاره ويا هو انا أبوكلام كلمتكم..؟؟؟
المك/داؤد أبوكلام داؤد
الإثنين ٥/٥/٢٠٢٥
