سامي مصطفى أمين يكتب: في شمبات صب المطر

مساحة للكلم

سامي مصطفى أمين يكتب:

في شمبات صب المطر

شفت في الجوال

في شمبات صب المطر..

شميت ريحة الدعاش

من النيم من الواطه

المخضبة بالطين

وصفق الشجر..

شفت الشفع

المرقت تهلل.

(يا مطيرة صبي لينا)

و الشباب بتفتح في الجداول

عليهم المطر إنهمر..

ساعة كانت قبل المغيب.

في الأفق هناك قوس قزح

للعيون ظهر..

شفت الشمس فترانه نازلة

الأفق بكل لون إذدهر..

النساوين طلعن يشابن

يضايرن الحيشان.

يلملمن الهدوم الفي الحبل

تاني يعصرن..

مرقو الرجال من صلاة العصر..

ولسة المطر.

مرات ينقنق في السقوف

مرات ينهمر..

ناس قالوا.. ده جو فول..

ناس فسيخ..ناس مديدة تمر..

يا سلام علي شمبات

زمن الخريف.

النيل شبع دخل عليها

فاطي للقيف.

غطى المزارع زار الشجر..

الماء والخضرة

و الوجه الحسن

فيكي ياشمبات وحلو

السمر..

سامي الشاعر..

القاهرة.