من القلب الي القلب محمد طه محمد عبد الله يكتب (رسالة عاجلة للاستخبارات العامة ووزارة الداخلية و هيئة الاستخبارات العسكرية).

حقيقة الحاصل في الخرطوم ده
ما طبيعي..طلمبات العاصمة كلها فاضية لا بنزين لا جاز لوحات مكتوب فيها لا يوجد وقود وفي نفس الوقت الشوارع مليانة عربات ملاكي وركشات شغالة ٢٤ ساعة والسفريات شغالة الخرطوم مدني الخرطوم عطبرة بي أضعاف التذاكر..الشارع مدور كأنو مافي أزمة
السؤال البسألو أي مواطن
البنزين والجاز ده بيجي من وين ؟؟؟
واضح انو في تجار أزمات
واضح انو في ناس عندها تناكر وبراميل بتبيع سوق أسود..وواضح انو في ناس بتستلم حصص وتسربها برة الطلمبة.المواطن الغلبان هو البدفع التمن يقيف بالساعات في الطلمبة وفي النهاية يقولوا ليهو مافي ويمشي يشتري من السوق الأسود بي ٣ أضعاف ده شغل
استخباراتي بحت ده أمن قومي
بنطالبكم بالاتي
١/ مداهمة مستودعات السوق الأسود في اطراف الخرطوم وبحري وامدرمان.
٢/ مراجعة حصص الطلمبات وين بتمشي وكاميرات المراقبة بتاعت الطلمبات.
٣/ مراقبة خط سير التناكر من المستودع لحدي الطلمبة.
٤/ تفعيل بلاغات المواطنين على تجار الأزمة ديل.
يا استخبارات يا داخلية
المواطن لما يجوع ولما يتعطل رزقو بسبب الجاز دي بتبقى قنبلة موقوتة
والعدو الحقيقي مرات ما بكون شايل سلاح..بكون تاجر أزمة بستغل الحرب.
اقطعو يد تجار الأزمات قبل
ما المواطن يفقد الثقة نهائيا.
اللهم بلغت.
محمدطه محمد عبدالله