داير أعيش يا بحر.
وأغادر المراكب والسفر..
وأتوب من الغربة وبلاد.
وناس قلوبها من حجر..
داير أعيش يا بحر.
داير أعيش فوق جزيرة..
وأعاين المراكب في مسيره..
وأجتر رحلاتي العسيره.
وأحكي العجائب للبشر.
داير أعيش يا بحر.
أمرق من الموج العنيف.
وألملم شراعي خلاص أقيف..
ما العواصف في الخريف.
ما بترحم في البحر..
داير أعيش يا بحر.
ما كفايه الشفتو ويل
لما تهته زمان في ليل.
ما قدرت أرجع للقبيل
وشقيتو موجك في خطر.
داير أعيش يا بحر.
فيك كملت السنين
للوطن قاتلني الحنين..
ما الغربة زي حياة سجين.
كفايه ضاع فيها العمر..
داير أعيش يا بحر.
يا بحر أنا تاني جافي
ما خلاص غادرت المرافئ.
وضل حبيبي لقيتو دافي.
خليتو موجك والسفر..
سامي الشاعر..
بورتسودان ١٩٨٨..
