إطلالة
توفيق جعفر يكتب (حكايات ود البرعي) مأسآة أسرة ..! ؟
شر مورد هي الحرب، لا تبقي ولا تذر .. تشتت الآمنين، تهلك الأحياء، فتنزح النساء وكبار السن ، والأطفال ينزحون طلب النجاة في رحلات مجهولة بأقدامهم سيرا، في بلد متسع جدا جدا ..!
وهاهو عبد الوكيل الشاب المقيم في بيت ود البرعي يحكي شيئا من هذا :
_ لامن ناس الدعم السريع طوقوا قريتنا بي كلو حتة، ابوي اسمو طه عمرو تسعين سنة وامي حاجة بتول كم وتمانين واخواتي اتنين واخوالي وخالاتي كلنا تمانية، ركبنا لينا كارو، ركبنا النسوان وانا عبيد خالي ماشين كداري .. الخ
واصل قائلا ماشين يومين عدل المناقل … ابوي تعب نزلناه فرشنا ليهو قال والله ما بقدر اقوم … رقدنا جمبو خمسة ايام بعداك دخل في غيبوبة …
واخير اتوفي علينا في الخلا داك … !
لقينا اسرة تانية مسافرين جو بعندنا ساعدونا في الدفن ..
وجزاهم الله خير شالونا معاهم، قلنالهم ودونا قدام لامن جينا ود المبارك دي ..!
وانتو ضيفتونا وسكنتونا معاكم ..!
رحب بهم ود البرعي قائلا:
_ كان عجبكم بلدنا تمشوا تسجلوا معلوماتكم كلها ، ونحنا كلجنة بنسكنكم معانا عديل ونديكم ارض ونساعدكم في بنايتها بإذن الله ..!
كاد الدمع يطفر من عيني عبد الوكيل غير مصدق ..!
_ والله دي أمنيتنا ونحنا عندنا بيت مبني بالطوب نمشي نبيعو واجي ابني هنا طوالي ، تاني ما راجعين قريتنا القوز ..!
اللجنـة المخصصة لموضوع اسكان النازحين بدات تستلم معلومات عنهم، واللي عندو بيت في مكان سكنو القديم يمشي يبيعو ويجي يشتري ارض ، او ممكن يشتري بيت عديل ..!
وهكذا لم تمس اراضي ود المبارك بشيء ، تشتري لمن يريد البيع، وتتعرف اللجنـة على مدي انضباطك بالآداب العامة ، حتي لا يسكن شخص غير منضبط …
شايف معاي …!
.
. ونواصل
. tofyjpir0@gmail.com
.
