محمد غبوش يكتب : القول (الحراق).. في السواقة بالدقداق

إعلام المريخ شغال (سواقه) جد في جماهير النادي..

سواقه.. بالدقداق..

آل أيه .. آآآل..

المريخ يخسر امام موكورا 1-0 في الدوري الرواندي.. الخسارة الأولي بعد 22 مباراة ..

البسمع الكلام ده بفتكر أنو الـ(22) مباراة دي كلها إنتصارات..

وبفتكر أن الأحمر (متوهط) في الصدارة..

دي ماعدم خسارة يا حلوين.. دي أسمها حالة (ألا فوز)..

يا شاطرين.. في كل مباراة بتتعادلوا فيها بتخسروا (نقطتين).. وبتحققوا (نقطة) واحدة.. فما منطقي تقول ماقاعدين نخسر..

الخسارة دي غيروها ولا شنو؟؟..

شوفوا يا حلوين..

طول ما إنتوا مركزين مع السيد الهلال.. ح تكونوا في النازل كده..

يعني حتى التعادل و(النقطة) الكنتوا فرحانين بيها ده.. مع إنه ما بتستحق.. تاني ما بتلقوها.. وهاهو موكورا يثبت لكم ذلك..

ياخ.. خليكم مع فريقكم.. وحاولوا ركزوا معاه أكتر..

يمكن.. يمكن تغيروا من حالته الصعبة دي..

نصحناكم.. وانتوا أحرار..وياموكورا أشعلت النار.. وأكدت الدمار..
(غبوش)