بعد الرجوع للوطن
كيف بقن؟؟
والشمس لتمن تصبح
عليكم بحرارة.
ماتزعلوا.
دي حرارة الأشواق
إتلملمن.
ماإنتو رحتوا وطولتو
هاجرتو وقت المحن..
هي زي الأم تمام
لامن وليدها يعود
ليها بعد طولة زمن.
تاخدو بالأحضان شديد.
تبلل صدره بالدموع
تبكي وإخواته يبكن
معن.
ياسلام لما الفجر
قبل الصباح .
أنواره تطلع.
(حي على الصلاة
حي على الفلآح).
وتصحى تلقى نفسك
في الوطن.
ياسلام..
زولا عزيز
في بيته.
بين أهله و إخوانه .
ما بدلت ريدته السنين.
ما غير إحساسه الزمن.
يشم نسايم النيل
مع شاي الصباح.
و قهوة كمان
مزاجه بيهن يوزنن.
يتمشى يتمطى
في كل طريق.
عزيز.
خطواته ثابتة
في أمن و أمان.
وين ما مشن يقدلن.
(يابلدي ياحبوب
يابجلابية وتوب)
يغني للحلوات ويرقصن.
انا تاني ما بفوتك يا بلد
حارة باردة
بالفيك والمافيك.
أعز منك مالي وطن.
انتي أمي وأبوي
أختي وأخوي
أنا مابخون
العيش والملح.
الدم واللبن..
سامي الشاعر..
