( الزول) والضحية..
والعيد مرق سكينو..
والسوق الرهيب.
ليهو محمر عينو..
مطلوب الكبش..
بفحمو.
بمواعينو..
والزيت والبهار..
والشربوت في ناس
حارينو..
ده ما عيد لبس العيال ..
ولا الفرش الجديد..
طاريينو..
ده عيد زمن الحرب
وناس شتات
نازحين ..
ده الحذرنا
منو..
والليلة إنكوينا
سنوات عايشنو..
المهم .. اللازمنا..
الخروف..
لو..
بعشرات الألوف..
المسكين الله يعينو..
بصندوق بسلفية.
لازم يرضي (أم زينو)..
يفرح شفعو..
يؤدي سنة دينو..
الله الكريم بعينو..
عام الرمادة الطال ..
وطالت الكرب.
كاربينو
متين يعود العيد
والسودان سلام.
في سلام ..
لممات فرح
وأمان
في كل بيت ضابحنو..
يارب يا كريم..
يعود..
وسودانا العزيز
بالإنتصار موعود..
زي ما كان زمان
ده الكلنا دايرنو.
كل نازح..
معزز يعود..
تعود الجيوش
منتصرة.
ينفض الدعم الصريع
المرتزقة المعاهو
منكسرة.
الإنتصار ما بعيد.
بعزم الرجال جايبننو..
سامي الشاعر.
كل عام وانتم بخير..
