سامي مصطفى أمين يكتب…مساحة للكلم…حنين مفارق..

مساحة للكلم

سامي مصطفى أمين يكتب.: حنين مفارق..

بعيد فارقت البلد

و أخذت بلدك في

قلبك معاك..

حزمت ماضي الذكريات

في حقائبك.

حملته في ظهرك وراك..

الغربة ما كانت خيارك

كانت جبر يومها داك..

سفرا بعيد من الوطن

بغصة في حلقك.و دمعة

شقاقك..

الوطن مجروح شديد

جرحو في قلبك جواك..

بتسأل بجوالك عنه..

كل يوم..

من صباحاتك لمساك..

يارب يتعافى الوطن

و يرجع تاني..(كل دعاك).

الأخوة و الحبان بعاد

الأهل في شتات هناك..

ما كنت تحلم إنو يوم

تتفارق و تفارق المعاك..

و لله أحكام يا قدر!..

يازمن..علينا مين قساك؟..

لابد باكر يوم نعود.

نتنسم يا بلد نسايم هواك..

نتعافى من الأسى الأليم

و نجمع شتاتنا في ضراك..

في سودان باكر جديد..

بدون حروب خلاص كفاك..

*سامي مصطفى امين*