نحنا أبناء السودان بنحمي السودان ما بالسلاح بس بنحميهو بي وحدتنا..ما نتفرق قبيلتي وقبيلتك حزبي وحزبك دي الحاجة الخربتنا السودان ده حقنا كلنا جعلي وفوراوي ونوباوي وشايقي وبجا وزغاوي كلنا أولاد بلد واحدة لو اتفرقنا أي زول بيجي يشيل مننا حتة. نحفظ أرضنا وزرعنا أرضنا دي ذهب نزرعها ونعمرها وما نبيعها للأجانب وما نحرقها بالحرب..نعلم أولادنا الزول المتعلم ما بيتغشى وما بيمشي يحارب أخو بالساهل..علم ولدك علم بتك دي هي الحماية الحقيقية..ما نبيع ضميرنا ما نقيف مع البيدفع أكتر ولا مع البيجينا من برا نقيف مع الحق ومع الوطن حتى لو كان ضد مصلحتنا..وأخيرا ندافع عن الوطن بأننا نجند نفسنا ونتدرب بحمل السلاح لنناصر جيشنا عند المحن.. لكن التجند الصح ما ساي تشيل سلاح وتمشي التجند الصح يكون تحت راية الدولة ما تحت راية قبيلة ولا حزب تتدرب مع الجيش وتسمع أوامرو وتشتغل بي نظامو لأنو الفوضى والسلاح السايب هو البخرب البلد أكتر من العدو..تتدرب صح السلاح ما رجالة ساي السلاح مسؤولية الزول الما متدرب بيضر أهلو قبل ما يضر عدوه التدريب بيعلمك الانضباط وحماية المدنيين وكيف تحافظ على سلاحك وكيف تحافظ على نفسك تحمي ما تخرب الجندي الحقيقي هو البيحرِس بيوت الناس ومدارسهم ومستشفياتهم ما البيخوفهم نحنا بندافع عشان أهلنا يعيشو في أمان ما عشان ننتقم..عشان كده لو داير تتجند أمشي بالطريق الرسمي سجل في الجيش اتدرب وخليك جاهز ودي أحسن من أي سلاح سايب برا القانون.. والزول الفي جدة وبيرسل لأهلو وبيعلم أولادو حب الوطن وبيرفض الفتنة في الواتساب والفيس ده برضو بيدافع عن السودان وما أقل من الشايل سلاح. السودان ما بيحموهو العساكر بس بيحموهو المزارع البيزرع والمعلم البيعلم والطبيب البيداوي والشاب البيرفض الفتنة والجندي المتدرب الواقف وقت المحنة.
محمدطه محمد عبدالله
