.
يا أهلي يا سودانيين
يا أهل الحارة ويا ناس الحوبة في رحلة الحياة دي وخصوصا في المحنة الكبيرة البنمر بيها هسع حتلاقو ألوان من البشر وأشكال من الناس حتلاقي الزول البشوفك أطيب زول في الدنيا ويشيلك في راسو وحتلاقي الزول البشوفك أكعب زول ويشيل سكينو وراك حتلاقي البشوفك وطني وبطل وود رجال وحتلاقي البشوفك خاين وبياع وطن..حتلاقي البقول فيك سمح.وحتلاقي البقطع فيك ليل ونهار وعشان كده أهلنا زمان قالو كلام سمح شديد قالو: كلام الناس لا بودي ولا بجيب وقالو: الجمرة بتحرق الواطيها. وقالوا: الما بتعرفو تجهلو وقالو: الكلاب تنبح والجمال ماشة وقالو: إيد على إيد تجدع بعيد وقالو: الزول بعينو لي نفسو.فما تشتغل بي كلام الحاسدين ولا الحاقدين ولا الجهلة ولا المأجورين ولا القاعدين برة البلد وبيقبضو التمن عشان يشتمو أهلك وجيشك إنت عارف نفسك وربك عارفك وتراب بلدك عارفك..واعلم يا أخوي إنو العيب في البعيب وكل زول بشوف الناس بعين طبعو..الطيب بشوف الناس كلها طيبة والخبيث والله لو لبست ليهو حرير بشوفك خبيث زيو.نحن سودانيين بنعرف بعض كويس معدننا أصيل وطيبتنا معروفة.زي ما قال الشاعر:
مرسي صالح سراج
نحن في الشدة بأس يتجلى وعلى الود نضم الشمل أهل.
وقال ود حد الزين بلادي أنا بلاد ناسا في أول شي مواريثهم كتاب الله وسيف مسلول وساقية تئن من الوجع وبيت شعر وغنا وطفلين..
وقال محجوب شريف:
وطنا الباسمك كتبنا ورطنا أحبك مكانك صميم الفؤاد يا أهل السودان البلد دي حقتنا كلنا ما حقت زول براهو والجيش ده جيشنا كلنا ما جيش زول براهو. فما تخلّو كلام الناس يفرقنا ما تخلو زول يجي يقول ليك إنت من وين وإنت قبيلتك شنو..نحن كلنا سودانيين ودمنا واحد ووجعنا واحد وفرحنا واحد..
المثل بقول
أخوك كان ما بنفعك ما بضرك وهسع نحن محتاجين ننفع بعض محتاجين نقيف مع بعض محتاجين نسند بعض محتاجين نعاين قدام.
فأمض في مسيرتك ولا
تلتفت إلى الوراء..ما تقيف عشان فلان قال وعلان نشر في الفيس ولا في التوك توك أمضي أزرع أرضك أمضي أبني بيتك..أمضي ربي أولادك على حب الوطن أمضي وخليك واقف مع جيشك..أمضي وخليك مع الحق..زي ما قالوا أهلنا.. البمشي براهو بقع والبمشي مع الجماعة بصل..ونحن ماشين مع جيشنا وماشين مع وطنا وماشين مع الحق وحتما بنصل وحتما سينهض السودان شامخا عزيزا رغم أنف الحاسدين والحاقدين.
جيش واحد شعب واحد وطن واحد.
محمدطه محمد عبدالله
