من القلب الي القلب محمد طه محمد عبد الله يكتب : (السودان جهاز علق وداير فرمتة)

نكتب ليك انت لأنك زول الدواس وزول الحارة والسودانيين قالو الما عندو كبير يشتري ليهو كبير وانت كبير معركة الكرامة..وقالو كمان الجمرة بتحرق الواطيها ونحنا الواطين الجمرة دي سنينه عددا.
سيادة الفريق ياسر العطا
السودان ده ما جهاز صغير السودان جهاز وطني عظيم لكنو علق عديل وبقى تقيل والمثل بقول السواي ما حداث ونحنا لينا سنين بنقول بنصلح والحقيقة المرة انو الجهاز داير فرمتة كاملة وداير اعادة ضبط مصنع ما داير لصقة جروح ولا بنج موضعي..
الحصل شنو يا سيادة الفريق
الحصل بيوري انو في زول بيرسل اللوكيشن من جوة.
الحملة الاولى
ضربو خمسة محطات مرة واحدة الجنيد وسنجة والحواتة والفاو ومشكور اربع ولايات دخلت الضلام في نفس الدقيقة..
الحملة التانية
فجرا ضربو الام بتاعة الكهرباء محطة المرخيات غرب ام درمان البتغذي الخرطوم والجزيرة..نفس النيشان ونفس الدقة.ودي ما صدفة المثل بقول الما في بطنو حرقص براهو برقص والضرب المتكرر ده وراهو حرقص داخلي..ده شغل عدسة بتصور من جوة ده شغل زول بفتح الواي فاي للعدو وبقول ليهو اضرب هنا..الفيروس الجوة اخطر من العدو البرة.
سيادة الفريق ياسر العطا
اهلنا قالو البباري الجداد بودي الكوشة ونحنا بارينا العملاء كتير وقالو الايد الواحدة ما بتصفق لكن الايد الخاينة بتخرب تصفيق الوطن كلو الجهاز مليان فيروسات..فيروس قاعد في الخدمة المدنية يستهلك بطارية الوطن وما بشحنها..شايل قلم مأجور ولسان بكذب وبالموروث حقنا بنقول الخاين اختو طاردة واخوهو ما عندو.. الخاين ما إلا الشايل كلاش مرات الخاين شايل معلومة شايل صورة محول شايل احداثية وبرسلها في واتساب وده اخطر من الرصاصة لانو بضرب الروح المعنوية زي ما قال الشاعر:_
نحن في الميدان جنود ما بنهاب الموت.والخان الوطن يبقى عار بين البيوت..
الشاشة اتخدشت
الهوية الوطنية دي شاشة الجهاز شاشة غالية لكن اتخدشت بالوجود الاجنبي غير المقنن الداخل ساي بدون ورق..والمثل بقول الباب البجيب الريح سدو واستريح بابنا فاتح ساي الداخل داخل والمارق مارق…دولة ما عارفة منو الداخل كيف تحمي احداثيات كهربتها..ضبط الوجود الاجنبي ما عنصرية ده سيادة..ده الجدار الناري البيحمي الوطن.
مطالبنا يا أسد الكرامة
قال الشاعر الوطني..أنا سوداني أنا.. أنا افريقي أنا بخدم بلدي بجدارة ونحنا دايرين تخدم بلدك دحين..
١/ فرمطو الجهاز فرمتة حقيقية نضفو الخدمة المدنية من كل عميل نايم وكل ملف تجسس زي ما بنفرمط التلفون من الفيروس.
٢/ ركبو استيكر حماية قوي على شاشة الهوية الوطنية ونظمو الوجود الاجنبي فورا.
٣/ انزعو الشاحن واقطعو النت عن كل خاين..العندو قش في راسو ما تديهو كبريت.
٤/ حصنو محطات الكهرباء دخلوها تحت الارض وختو ليها مضادات مسيرات ما تخلوها في العراء زي الجدادة العميانة هدف ثابت كل شهرين ينضرب.
٥/ افتحو تحقيق ناري وبل حقيقي عن تسريب الاحداثيات والمثل بقول المسامح كريم لكن في حق الوطن ما في مسامحة..
سيادة الفريق ياسر العطا
الشعب ده صبر والصبر حدود صبر على الحرب وصبر على النزوح وصبر على الجوع لكن ما ممكن يصبر على الضلام والعطش بسبب اهمال موظف وبسبب خاين فاتح النت للعدو..الشعب داير فعل ما داير بيان شكر..داير بل في المكاتب قبل بل الميدان عشان بعد الفرمتة يرن جهاز الوطن من جديد..لكن نغمتو ما تكون نغمة عادية تكون موسيقى عسكرية وطنية تطرب المسامع وتزل عروش الخونة..تكون نغمة جيش واحد شعب واحد هنا السودان هنا العزة هنا السيادة جهاز وطني لا يقبل التهكير ولا يقبل الاختراق ده وقت الحسم ده وقت الفرمتة..ولا نامت أعين الجبناء.
محمدطه محمد عبدالله