من القلب إلى القلب محمد طه محمد عبد الله يكتب: ولا يزال الوجع يتسرب من مسامات الصمت..فلا صمتنا يسترنا ولا نحن على البوح قادرين

هذه البلاغه في التعبير اقتبستها
من المستشاره منال محمد الحسن. سلمها الله
نحن جيل شايل وجعو في صدرو وساكت بنصحى الصباح نغسل وشنا ونلبس وش تاني غير وشنا الحقيقي..وش بضحك وش بقول كلو تمام.. ووش بيجامل لكن جوة جوة في حتة غريقة مافي زول واصلا..الوجع ما بجي بصوت عالي..الوجع بتسرب زي الموية من الحيطة المشققة شوية شوية لحدي ما الحيطة تقع..وده حالنا.. سكتنا كتير قلنا السكات سترة..لقينا السكات ذاتو فضحنا بقى باين في عيونا في سرحاننا..في قعدتنا برانا..ودايرين نتكلم..الكلام واقف في الحلق لا قادر يطلع يريحنا ولا قادر يرجع يخلينا نعيش..بقينا نخاف نحكي..لو حكينا منو البفهمنا؟ ولو سكتنا منو البحس بينا؟ نحن لا مرتاحين في صمتنا ولا قادرين على البوح..نحن في النص موجوعين من الحالتين..ومع ذلك لا يزال فينا نبض بقول بكرة احسن ولا يزال فينا ضوء صغير بقاوم العتمة دي كلها..يمكن ما الليلة ويمكن ما بكرة لكن ح نلقي زمن نقدر فيهو نبوح من غير خوف ونصمت من غير وجع.
محمدطه محمد عبدالله