“يا جماعة يا أهلنا العملو الجماعة”
ديل بضرب محطات الكهرباء بالمسيرات دا ما شغل حرب دا شغل إجرام وخراب عديل ..
“نحن في رابطة الإعلاميين بالغربيه”
في الغربية ومعانا كل أبناء الجالية هنا في جدة والغربيه بنستنكر وندين العمل التخريبي الجبان دا بأشد العبارات الكهرباء دي حقت الشعب حقت المواطن المسكين حقت المستشفيات والموية والتلاجات البقطع الكهرباء بقطع نفس الناس وبقتل المريض في المستشفى..البحصل دا بوري بوضوح إنو الحرب دي ما حرب داخلية ساي دي حرب عديل لتدمير السودان وتفكيك الدولة حرب ممولة ومدعومة من دول كتيرة فاتحة حدودها لدخول السلاح والمرتزقة البحصل دا داير يركع الشعب السوداني لكن هيهات الشعب دا ما بركع صبر واتحمل الكتير .. وحيتحمل ويبني بلدو من جديد ..
عشان كدا بنقول
١/ لازم نوثق الجرائم دي كلها صورة وصوت عشان حقنا ما يضيع ..
٢/ لازم نفضح في الإعلام أي جهة بتخرب وتدعم الخراب ..
٣/ ولازم نقيف كلنا مع جيشنا..الجيش هو الحارس الباقي للوطن..الشغلة دي بقت واضحة يا نبقى مع بعض ونبني بلدنا يا نخلي الأجانب يدمروها لينا حتة حتة ..
ربنا يحفظ السودان وأهلو وينصر جيشنا.
“رابطة الإعلاميين السودانيين” بالمنطقة الغربية وأبناء الجالية بالغربية.
جدة الثاني من نوفمبر ٢٠٢٦م.
