من القلب الي القلب محمد طه محمد عبد الله يكتب: عندما تنتهي الحرب لن نعود كاملين. رسالة إلى وطن جريح

عندما تنتهي الحرب لا تسألوني عن الفرح اسألوني عن الغياب سنعود لكننا لن نعود كاملين سنعود وقلوبنا ناقصة بيوتنا ناقصة أهلنا ناقصين عمرنا ناقص الحرب ما سرقت مننا بيوت بس سرقت مننا ناس سرقت مننا سنين سرقت مننا أحلام سرقت مننا أجمل ما فينا..كم أم ماتت وهي منتظرة ولدها؟ كم أب مات وهو بحلم يرجع بيتو؟ كم طفل كبر وما بعرف بيتو إلا بالصور؟ كم صاحب بقى مجرد اسم في الدعاء؟ ده وجع ما بتوصفو الكلمات.ده وجع بتحسو في صدرك كل ما تتذكر زول كان معاك وهسي ما معاك ستنتهي الحرب لكن السلام ما حيرجع الماتو..ولا حيرجع العمر الضاع..ولا حيرجع الطفولة الاتسرقت.ولا حيرجع القلب زي ما كان السلام حيسكت صوت الرصاص..لكن صوت الفقد جوة القلب ما بيسكت.ومع ذلك حنرجع حنبني حنزرع حنعلم أولادنا يحبوا السودان ما عشان الحرب انتهت عشان السودان ده حقنا وما عندنا وطن غيرو حنرجع ونحن شايلين وجعنا وشايلين ذكرى ناسنا وشايلين عهد أنو تاني ما نسمح لحرب تسرق مننا عمر تاني يا سودان سامحنا نحنا أبناءك تعبنا اتشردنا اتوجعنا لكن لسه بنحبك ولسه بنحلم بيك ولسه شايلينك في قلوبنا يوم تنتهي الحرب..حنرجع ليك ولو بأجساد تعبانة وقلوب مكسورة وأعمار سرقتها الحرب..حنرجع لأنك وطننا وما عندنا وطن غيرك.
اللهم احفظ السودان وأهله
اللهم اجمع شملنا اللهم اجبر كسرنا اللهم عوضنا خيراً مما فقدنا.
محمدطه محمد عبدالله