من القلب الي القلب محمد طه محمد عبد الله يكتب يا بلادي يا كلي وبعضي السودان أمانتنا طيننا نار ونور.

نتحدث عن جزء من القصيدة للشاعرة روضة الحاج
يا بلادي قسمي النيل إذا كنت تريدين انقساما قسمي الشمس فما زالت تغني للبيوت السمر من نملي لحلفا وتسمي أهلها السمر كراما..قسمي الليل المغني حين يشدو العطبراوي أنا سوداني فنفنى فيك وجدا وهياما..قسمي أحلامنا عدلا وقسطاسا مبينا قسمي أشواقنا أفراحنا أحزاننا تاريخنا الممتد فينا كلما نودي يا زول التفتنا لهفة ودا وحبا وحنينا.يا بلادي يا كلي وبعضي..يا معي هل أنت ضدي.. نح مليا أيها الشاعر. وابكي فأنا أطلب التأشيرة اليوم بأرضي سرقوا
السودان من وحدته
وفلسطين المجيدة إنما الأرض ستبقى وتثور..طيننا يمكن أن يصبح نارا..طيننا يمكن أن يصبح نورا.
الرسالة للشعب السوداني
من واقع هذه القصيدة التي أعجبت بها حتي النخاع.يا أهلي وعشيرتي ياهل السودان اسمعوني بقلبكم.. يا بلادي يا كلي وبعضي يا معاي هل انتي ضدي..
نحنا ما انقسمنا برانا
في يد سرقت السودان من وحدتو سرقت الثورة والتاريخ والأحلام سرقت دارفور من ثروتها دايرين يقسمونا يقسمو النيل يقسمو الشمس يقسمو الليل يقسمو أحلامنا وأشواقنا وتاريخنا لكن السودان ما خريطة بتتقسم بالمسطرة السودان زول..لما تناديهو يا زول بيلتفت ليك لهفة وود وحب وحنين..يا سودانيين ما تخلونا نطلب تأشيرة عشان ندخل بلدنا ما تخلونا نبكي على بلد سرقوها مننا ونحنا واقفين نتفرج..البيقول ليك دا شمالي ودا جنوبي ودا شرقي ودا غربي دا هو السارق الحقيقي دا هو الداير يقسمك عشان يسرقك وانت ضعيف نحنا كلنا سودان.
جعلي وفوراوي ونوباوي
وشايقي وبجا وزغاوي..كلنا أولاد نملي لحلفا..كلنا أولاد بيت واحد يقسمو شنو يقسمو النيل كيف والنيل ماشي في دمنا..يقسمو الشمس كيف والشمس بتغني لبيوتنا السمر..يقسمو الليل كيف والليل بيغني معانا أنا سوداني.
يا أهل السودان أرضنا
لسه حية طيننا ممكن يبقى نار طيننا ممكن يبقى نور لو اتوحدنا بنبقى نار على العدو ونور لأولادنا ما تخلو زول يسرق منكم بلدكم بي ورقة ولا باتفاق ولا بفتنة في الواتساب.
السودان أمانتنا والأمانة
ما بتتقسم الأمانة بتتحفظ خلو يدكم واحدة..وقلبكم واحد وكلمتكم واحدة.
يا بلادي يا كلي وبعضي
ما حنخليك ضدي حنخليك معاي حنخليك لينا كلنا.
ختاما تنويه وتحليل
القصيدة دي ما للبكاء بس دي كشف لسرقة الأوطان بالورق والاتفاقات..
الشاعرة قالت قسّمي النيل
وقسمي الشمس وقسّمي الليل عشان توريك إنو التقسيم مستحيل..كيف تقسم حاجة عايشة في دمك وفي وجدانك..
وأوجع بيت فيها
أطلب التأشيرة اليوم بأرضي..ده السوداني البقى غريب في بلدو..ومحتاج إذن عشان يرجع لبيتو.. وختمت بأمل طيننا ممكن يبقى نار وطيننا ممكن يبقى نور..يعني لو اتوحدنا بنبقى نار على العدو ونور لأولادنا.
محمدطه محمد عبدالله