قصة أغنية كيف لا أعشق جمالك والتي تغني بها عثمان حسين قبل ما يقارب نصف القرن من كتابتها كان شاعرها محمود التنقاري
له دكان في السوق بشارع العناقريب وفي مرة هو في دكانه مرت فتاة ممشوقة القوام فنظر إليها ولكن لم يتأكد من ملامحها وفي ذاك الزمان كان الحياء والعفة تمنع الرجل من الحديث المباشر مع مرأة لا يعرفها فظلت الفتاة في ذاكرته بعد ثلاث اشهر وهو في دكانه رأي أهل الفتاة قادمين من السفر وكان منزلها قرب دكانه فإنتهز الفرصة لرؤيتها وقدم يد المساعدة في حمل الحقائب حمل الحقيبة الاولي والثانية فكانت خفيفة الحقيبة الثالثة كانت تقيلة فتعب من حملها فجاءت الفتاة وقالت ياعم ليه تتعب نفسك أرتاح شوية فرفع راسه فرأي وجه الفتاة أية من الجمال هي نفس ملهمته فإنطلقت الكلمات.
كيف لا اعشق جمالك ما
رأت عيناى مثالك و كيف لا اعشق جمالك.كيف لا اعشق جمالك وانت مغرى.
أعجب بجمال الفتاة وادبها
لانها طلبت منه الراحة وسقته الماء البارد فقال:
زنت بى ادبك جمالك وانت سحرى
عندما حمل الحقيبه وشعر ببعض التعب رأي في ذلك بعض الزل والهوان ولكن كل يهون من أجل هوي هذه الفتاة فقال
فى هواك لاقيت هوانى و بيهو راضى..كيف لا اعشق جمالك.ما رأت عيناى مثالك وكيف لا أعشق جمالك. كيف لا اعشق جمالك وانت مغرى زنت بى ادبك دلالك .. وانت سحرى فيك اجمل شي خصالك وانت بدرى وابعد الغايات مالك لو رنيت ترسل نبالك قلبى لاعب بيهو مالك..ليهو حق لو كان هوانك وكيف لا اعشق جمالك بسمتك توحى الاغانى واسمى ايات المعانى..فى هواك لاقيت هوانى وبيهو راضى..معتلى قلبى و لسانى..تندى زى زهر الخميلة..تزدهر فى روح جميلة..وعاليه اخلاقك نبيلة..ويخجل البدرين هلالك وكيف لا اعشق جمالك..انت رافل فى نعيمك..وبس انال منك جحيمك..وقول لى كيف اظفر بليمك..نارى تتطفى روحى ترقى..فى سما العز ذي كمالك.
أعلاه قصة هذه الاغنيه التي صاغها الشاعر محمود التنقاري تاجر الصيني في امدرمان وتغني بها ابن حي الزهور الخرطوم الفنان عثمان حسين.
وانا بدوري اقتبس هذا الجمال
المغري لوصف جمال الشعب السوداني.
الموضوع
الجمال السوداني كيف تشوفو وكيف تعيشو.
يا أهلنا السودانيين في الداخل والخارج.الليلة موضوعنا الثقافي ما عن الشعر ساكت ولا عن الغنا ساكت موضوعنا عن الجمال الجمال السوداني..الجمال البنعيشو كل يوم من غير ما نحس بيهو.في ناس كتار بفتكروا الجمال هو جمال الوش وجمال الهدوم وجمال العربية وجمال البيت لكن الثقافة الحقيقية بتقول لينا الجمال ما كده الجمال هو جمال القلب وجمال الروح وجمال الكلام وجمال الفعل..
كيف لا أعشق جمالك ما رأت عيني مثالك
الزول لما يقول الكلام ده هو ما بتكلم عن جمال واحد ولا عن بت واحدة ولا عن ولد واحد هو بتكلم عن جمال شعب كامل عن جمال أمهاتنا الصابرات البيربوا أولادهم على العز والكرامة رغم الحرب والوجع عن جمال آباءنا الشقيانين البشيلوا هم البيوت على كتافهم وما بشتكوا عن جمال جنودنا الواقفين في الميدان حارسين الوطن بدمهم وروحهم عن جمال أطفالنا الضاحكين رغم الجوع ورغم النزوح ورغم الوجع لسه بيضحكوا ولسه بيحلموا.
وكيف لا أعشق جمال
كيف لا نعشق جمال الشعب البقسم لقمتو مع جارو كيف لا نعشق جمال الزول البفتح بيتو للنازح من غير ما يعرفو كيف لا نعشق جمال البت البتقيف مع أهلها في الحارة والباردة كيف لا نعشق جمال الولد البشيل أمو وأبوهو في عيونو كيف لا نعشق جمال السودان أرضو ونيلو وسماهو وناسو وترابو حتى ترابو جميل لأنو تراب أجدادنا وتراب شهدائنا.
ما رأت عيني مثالك
في الثقافة السودانية الجمال عندو معنى تاني.. الجمال عندنا ما في المراية الجمال عندنا في الحوش الكبير البلم الناس..الجمال عندنا في الصينية البتلم الجيران..الجمال عندنا في الجبنة البتتشرب على الفحم مع الحبان..الجمال عندنا في الكلمة الطيبة البتتقال للضيف..الجمال عندنا في العفو والتسامح والكرم والشهامة ديل هم مثال الجمال الحقيقي وده هو الشي الخلانا شعب مميز بين كل الشعوب.
كن جميلا ترى الوجود
جميلا وده هو أهم درس ثقافي في الموضوع ده الشاعر لما قال كن جميلا ترى الوجود جميلا كان قاصد إنو الجمال بيبدأ من جواك ما من براك لو قلبك نضيف حتشوف كل الناس نضاف ولو نيتك صافية حتشوف الدنيا صافية ولو روحك جميلة حتشوف الوجود كلو جميل لكن لو قلبك مليان حقد وحسد وكراهية حتشوف الدنيا كلها سوداء حتى لو كانت جميلة قدامك.
عشان كده الثقافة بتعلمنا إنو الزول الجميل هو الزول البسامح والزول البعفي والزول البساعد والزول الببتسم والزول البقول كلمة طيبة والزول البشيل أخوهو وقت الشدة والزول البقيف مع وطنو وقت الحرب ديل هم الجميلين الحقيقيين وديل هم البخلوا السودان جميل.
يا أهل السودان ثقافتنا كلها
قايمة على الجمال ده ثقافة الكرم والجود وثقافة الشهامة والرجالة وثقافة الحبوبة والجدة البتحكي لينا قصص زمان وثقافة الأغاني البتتكلم عن الوطن والحبيبة والتراب وثقافة الشعر البقول لينا كن جميلا ترى الوجود جميلا ديل كلهم رسالة واحدة بتقول لينا أبقوا جميلين عشان تشوفوا الدنيا جميلة.
وما تخلوا الحرب تشوه
جمالكم وما تخلوا الحقد يوسخ قلوبكم وما تخلوا الكراهية تسرق نوركم انتو أجمل شعب في الدنيا وجمالكم ده هو القوة البتخليكم واقفين لحدي الليلة رغم كل الوجع ورغم كل الدمار لسه جميلين ولسه صابرين ولسه رافعين راسكم.
وحيجي اليوم البنرجع
فيه كلنا وحنشوف السودان أجمل من أول حنشوف الخرطوم جميلة ومدني جميلة والفاشر جميلة وكل مدينة جميلة لأنو نحن جميلين ولأنو قلوبنا جميلة ولأنو وطننا جميل.
الخلاصة الثقافية
كيف أعشق جمالكم ما رأت عيني مثالكم وكيف لا أعشق جمال أهل السودان.. كن جميلا ترى الوجود جميلا يعني الجمال ما حاجة بنشوفها بعينينا بس الجمال حاجة بنعيشها بقلوبنا وبأفعالنا وكل ما كنا جميلين كل ما شفنا السودان أجمل وكل ما شفنا الدنيا أجمل.
محمدطه محمد عبدالله
