محمد غبوش يكتب :معذورين (ناس لمام) .. المشكلة في (الحمام) 

محمد غبوش يكتب :معذورين (ناس لمام) .. المشكلة في (الحمام)

غايتو نحن الدوري الموريتاني ده أكتر ناس إستفدنا منو..

بوريكم كيف.. الصبر بس..

إعداد.. وصدارة.. ولقب.. وضحك للضروس..

ناس موريتانيا عرفناهم زعلانين من الهلال (الثقيل) بي سببهم..

فريق جاهم ضيف.. (كاوش) على كل حاجة في بطولتهم الأولى.. صدارة، واقوى هجوم، وأقوي دفاع، وان شاء الله الهداف برضو..

عندهم (نواذيبو) ليهو 7 ولا 8 سنة ماعندو منافس.. بشيل الدوري قبل يبدأ..

فجأه كده.. لقى نفسو (وصيف) وفي كل حاجة.. ماليهو حق يزعل يعني؟ ..

لقى (السم القدر عشاهو) (جدري القيح البصقع) هلالنا الفي شطارتو مبدع..

طبعاً ليهو حق (يتنفخ).. و(يطرشق من الزعل ذاتو..

المشكلة في وصايفنا (ناس الحوت.. الأصلو وصايفة من الولادة وحتى الموت).. الزعل في شنو؟..

كل ما يلقوا تصريح لي (موريتاني من ضرب سيد البلدين بعاني).. يشيل ويشيروا.. ويبشروا فيهو..

متضايقين شديد من حالهم.. وماقادرين يقولوا..

منفوخين من الجميع.. ودايرين حاجة (تنفسهم)..

كانو هنا في السودان (وصيف) محترم لسيد البلد.. وبالمناسبة وصيف الأسياد شرف لو تعلمون كبير..

مشوا موريتانيا لقو نفسهم في حته تانية..

المركز السادس حتى الآن ..وما معروف بكرة يصلوا المركز كم ..

مريخ (غريب) في كل حاجة غريب.. حتى (وصافتو) ما لامي فيها..

قبل كده كتبت (نحن آسفييين.. عشان جااامدين)..

ومافي مشكلة نكررها تاني لي ناس لمام.. الفجأة بقوا معانا في مكانة الحمام..

نحن آسفيين.. عشان نحن جاااامدين.. وعلى الصدارة مسيطرين.. ووسط ارضكم وفي بطولتكم متصدرين..

أما لي ناس المريخ وصايفنا الدائمين.. برضو بنقوليهم نحن آسفيين.. عشان جااامدين.. وليكم دائما كاشفين.. وفاضحين..

(غبوش)