سامي مصطفى أمين يكتب: يابن بحبك 

مساحة للكلم

سامي مصطفى أمين يكتب: يابن بحبك

داير أقول ليك الحقيقة

يا بن بحبك من زمان..

من زمن حبوبة كانت

تسقينا ليك بحنان..

كانت (الضحوية) تقلي،

بنها بالهبهان..

تهبهب النار بانبساطه،

و تشمشم البن بامتنان..

يا بنيه (الهون) هناك

جيبوه دقو البن كمان..

والمويه بعد تسخنيها،

أديني البن أقهوجو

أصبو من الجبنة لكل

فنجان..

بخري الفناجين بالمستكة

الوقايه ختيها زينة،

زي عروس جرتقوها

وسط الحبايب والجيران ..

نادي حبوبتك وخالتك

ما اللمة حلوه مع الحنان..

ختو الجبنة وإتلموا فيها،

الونسه عمرت والمكان..

البخور جاولي وصندل

وطعموه بالند كمان..

حكوا حكاوي وعاشوا بهجة،

ما السعاده حزمة ألوان..

للجبنه في السودان معزه،

للضيوف عربون محبة

بعزو بيها كل إنسان..

يا بن بحبك من زمان.

من زمن حبوبة كانت

تسقينا ليك بحنان.

سامي الشاعر..