محمد غبوش يكتب :جااااااان.. بتلعب ضده بتطلع سكران

محمد غبوش يكتب :جااااااان.. بتلعب ضده بتطلع سكران

سمعنا بي (يُضّربك جان).. لكن (يبطحك جان) للدرجة الفي الصورة دي.. وفي صور كتيرة شديد..

ما سمعنا بيها إلا عند الجان (كلود) ..

الجنا ده.. غايتو بي سببه في مدافعين كتااار ح يعتزلوا اللعب بدري.. بدري..

وفي دكاترة مخاريق.. وغضاريف.. وركب.. ومفاصل سوقهم ح يبقى أحسن من سوق (الترزي) يوم الوقفة..

والأولمبياد..

آي.. مستغربين مالكم.. بطولة الألومبياد الواحدة دي.. ح تكسب منافسة جديده فيها..

إسمها ح يكون (التزلج على النجيلة)..

انتو.. تعالوا لي بي جاي دقيقة..

قايلين (الكاف) وقف الواد الجان كلود ده عشان أحداث مباراة مولودية الجزائر..؟؟

لو قايلين كده.. تبقوا غلطانين..

طيب أها يا أبو الأغباش ورينا أنت السبب الحقيقي شنو.. !!

السبب.. عمايلو البسوي فيها دي..

يااخ تحت.. تحت.. قالو ليك في أندية كتييييرة.. قدمت إحتجاجات شديدة اللهجة للكاف ضد الجان..

القال (إرهابي).. والقال تبع تنظيم (داعش) الكروي.. وفي ناس قالوا نحن ما بنلعب لو ما شفتو لينا حل مع (الداهية) ده..

أجمل حاجة في نادي قال الزول ده بلعب ضده المدافع (فايق وواعي) لامن تنتهي المباراة بكون (بترتح ويطوطح) ذي السكران..

ياخ أي مدافع بعد المباراة بطلع يغني : وبي سُكّر تملكني.. وأعجب كيف بي سكر.. رددت الكأس عن شفتي.. لعل (طوطيح) الجان لينا كان الخمّر..

(غبوش)