عبدالرحمن دقش…يكتب: كل الزوايا: ( طوال السبعين عام بالسودان بعد الاستقلال ماذا حصل ؟!!) (3)
* لو اردنا الدخول في تفاصيل واقعيه ماذا فعل حكام السودان في فتره السبعين من تلك السنوات وهل التزموا بخدمات الوطن العامه الصالحه وهل كانت هنالك اصلاحات. واضحه في الوضع العام ولم يظهر ( الخاص ) ابدا ؟!!
* هنالك الكلام الواضح والظاهر الذي يعرفه الاطفال قبل الكبار وهو ماذا لو اتجه حكام السودان طوال تلك السنوات من السبعين الظالمه المتحركه مثل الحرباء الي تنظيم المعدات الموجوده في السودان والمعروف ان الذي نجده فيه لا يوجد في كثير من الدول ورغم ذلك تفوقت وتقدمت ونهضت تلك الدول ؟!!
* يا حكام السودان ان وطنكم يفيض بالاراضي الزراعيه والانهار والمواشي والصمغ والسمسم والذره والذهب والمعادن والبترول والغاز واليورينيم ولكن من فكر منكم في البحث والعمل النافع ؟!!
* عليكم الله يا حكام السودان الان امشوا وابحثوا واسالوا اهل تلك الدول الافريقيه التي كانت في ( خانه ) الاصفار واليوم هي اعظم واقوي واغني دول العالم وعلي سبيل المثال عن كيف نهضت تلك الدول ومنها جنوب افريقيا وتنزانيا وكينيا ويوغندا وظهرت من الاخر دوله راوندا وقد اصبحت من اغني واميز وتقدم الدول بعد حرب عنيفه وفقدوا فيها مليون ونصف وبعدها اتفقوا ونهضوا وكانت النهضه والتقدم والسعاده!!
* يا علماء السودان البارزين والعمالقه والجهابذه لماذا لا تتدخلون لعلاج وتوضيح ما يمكن يقدم البلد الوجيعه وينقذها من الوقوع في قاعه التخلف وانتم تشاهدون ان السودان في مؤخره تقدم ونهضه الدول الاخري. ؟!!
* علماء السودان يقفون في ظل السكوت وهم علي علم ومعرفه ان الكثير من الدول قد تقدمت ونهضت بالحكمه والاتفاق ووصلت الي القمه خلال سنوات قليله وتكاد تحسب وتعد باصابع اليد الواحده ومنها علي سبيل المثال سنقافورا واليابان وراوندا ولكن في السودان تراكمت السنوات ووصلت الي السبعين ولا يزال تحت الارض وفي الدرك الاسفل والواضح ان حكام السودان قد ساروا في الحكم علي المثل ( حكمه البصيره ام حمد ) !!
* يا اهل السودان تعالوا مع بعض ندخل فصول علوم التقدم والنهضه وندرس بجديه ونحلل ونفتي ماذا قدم حكام السودان خلال السبعين من السنوات التي ركضت والشعب في نباح الكلاب ولم يتوقف ؟!!
* نمشي علي عشر سنوات بعد قيام الاستقلال ماذا وضع السودان من خطط وعمليات الاصلاح او دراسه و( تظبيط ) النهضه والتقدم مع الدول الكبري والاتفاق معها علي انجاز واحد ؟!! بكل حزن وجدنا الانقلابات العسكريه ولكن ما يفيد من تلك السنوات العشر لم يحصل !!
* الحلول كانت موجوده في السودان الغني بكل المصالح ولكنها تحت الارض وحقيقه لقد هزمتنا الانقلابات والاحزاب وتطبيق الايدولوجيات وكان ذلك هو السودان !!
* كان علينا في السودان ولا نزال ان نخطط ما يمكن انجازه داخل السودان في كل انحاء الدوله وبدءا من العاصمه الخرطوم وثم الولايات وكانت هنالك اشياء عديده الصحه والتربيه والتعليم والمواصلات والطرق الاسفلتيه والمباني والمصانع والعمليات التي تجلب الاموال والاستعانه بالدول الخارجيه في حفر ابار البترول والغاز واليورينيم والاستفاده من الذهب والمعادن والمواشي والصمغ والسمسم وتسجيل الاتفاقات القانونيه بين دوله السودان والدول الخارجيه !!
* يا حكام السودان القدامي الذين رحلوا وحكام اليوم هل تصدقون ونحن في امريكا وما زلنا انه في كل الاسواق نشاهد صمغ السودان والسمسم وليس مكتوب عليه : Made in Sudan. بل مكتوب عليه صنع في مصر وهنا اين نجد الصمغ والسمسم والكركدي بجمهوريه مصر ؟!!
* يا اهل السودان انتو ماشين بعيد ليه ؟!! قبل ايام تم كشف ان كوبري الحلفايا بالسودان قد تم اصلاحه بمبلغ 11 مليون دولار واين ذهبت تلك الاموال والاصلاح لا يحتاج لذلك وكمان بالدولارات ان هذا المبلغ يكفي لعمل شارع الخرطوم / مدني من اثنين ( قابل وراجع ) التي لم يفعلها حكام السودان قبل ثوره ديسمبر 2018م !!
* بعدين يا حكام السودان كلهم الذين كانوا داخل دائره ( السبعين ) ان دوله اثيوبيا ارادت شارع الي السودان حتي البحر الاحمر ولم توافق حكومات السودان وما كان الا ان طلبت من الصين عمل الشارع من اديس ابابا الي جيبوتي وهو في طول اكثر من 600 كيلومتر وتم التنفيذ خلال عامين وانتهت المشكله وهنا ماذا يقول حكام السودان عن ذلك الخبر ؟!!
* لقد طلبنا من حكومات السودان ان يضعوا ( قد جيوب ) شعب السودان ومافي مناسبات للغني والوطن في العنايه المركزه وامواله بتمشي وين وعليكم الاستعانه بدول مثل امريكا وروسيا والصين وتركيا لاخراج ما يمكن اخراجه وبالقانون ومثل ما تعمله مع الدول الاخري والسودان يفيض بكل المنتوجات الغنيه وبعدها سوف نجد السودان من اغني دول العالم واؤكد لاهل السودان ان ذلك يحصل في سنوات قليله !! يا حكام السودان لو تصدقوا ان شعب السودان سوف يطبق عليكم ( عفا الله عما سلف ) !!
* اخر الكلام نضعه امام الدكتور كامل الطيب ادريس رئيس مجلس الوزراء الانتقالي بحكومه الامل بالسودان وهو قد دخل ( منتخب ) السبعين ولهذا نوصيه وقد قلنا له ذلك كثيرا ولم ينفذ والامر ان يرسل جماعه من الوزراء والوزيرات الي دوله راوندا واخري الي سانقافوره لمعرفه كيف وصلوا الي القمه وانتصروا في سنوات قليله حتي نستفيد ونعمل ما عملوه !!
* يا كامل ادريس لو عاوز تذهب بنفسك لا مانع وتشوف وتري المعجزات في راوندا وسجل كل ما حصل في النوته وتصبح اجنده هامه وتنفذ في الوطن الجريح السودان !! يا كامل ادريس تذكر علي طول فتره ( السبعين ) عام التي حصل فيها ما حصل وصار السودان هو الوطن الممزق !!!
