دخلت التايه أمينة الصندوق في حتة صعبة جدا …
عرقت وصوتها جف وقالت وهي ترتجف :
ـ والله يا أخواتي غايتو أعفو لي أنا انصرفت في أمانتكم ودينت جبارة ود أختي قريشات ما شوية يعرس بيها ..و ..
تحركت عليها كلتوم مهاجمة بعيون فيها شرر وهي تصرخ :
ـ دينتي ود أختك عريس بتك قروشنا؟
وصرفتي أنا الماخليت حاجة أدفع وأدفع وما فضلت شيء لبنياتي ..!؟
كانت كلتوم قد أخذت بتلابيب التايه وأزدحمن في هرج ومرج وكوراك , وطلعن الشارع وكانت التايه غرقانة بيناتن وتوبها إتخاطفنو النسوان ..!
ولولا تدخل بعض الرجال من المارة لماتت التايه بينهن ..!
ـ ها يا نسوان أمشن بيوتكن بلا فوضي ..وأضطر حاج الماحي لإستعمال عكازو ..!
هربت النساء بعض أن أحاط بهن الرجال , وساعد المرضى وحمدان التايه في النهوض من الارض، وكانت بلا توب ، فأضطر المرضي لتناول توب من زوجته لستر التايه وكانت عيونها مزغللة ..!
في مساء نفس اليوم إنعقد اجتماع لجنة القرية برئاسة ود البرعي وطلبت اللجنة من حاج الماحي والمرضى تنويرها بالوقائع ..!
وأنصت أعضاء اللجنة لتنوير من حاج الماحي فقد كانت زوجته سعاد من منظمي صندوق توفير المال ..!
تداول الإجتماع كل أدلي برأيه ..
ـ كان مفروض يكون تحت رعاية اللجنة حقتنا دي ..!
ـ ما صاح يكون المال كلو عند زولة واحدة ..!؟
قال ود البرعي معقبا :
ـ يهمني سلامة حاجة التايه لأنها مرة كبيرة وفقيرة ..
وانا بعوض كل النسوان ديل حقوقهن كل الختنو
وبدفع الأخدتو التايه لعرس بنتها ونحن والله يا شيخ ادريس مقصرين كلجنة …؟
كيف نخلي الزي التايه تضطر من فقرها تشيل الأمانة العندها عشان تحل مشكلة عرس بتها؟
نحن نقعد من بكرة نرصد الحالات الزي دي ومعالجتها بإذن الله …!
tofeeg123@com
