ليه بلدنا
من التشاكس.
ما إتعافت؟
للأسف.
من..
حقي وحقك.
ياتمت.
ياما تمت.
مالبلد
ماإتلمت.
بلدا من الثورات .
شابت وهرمت.
سبعة وستين.
حروب متعاقبة
للآن ما هدأت.
ما إنجمت.
بعد (عبود).
قلبها (نميري).
وإحزاب الوجعة.
إتصارعوا فيها.
لما(ببشه).
تاني إنقلبت.
حكموها الكيزان .
بيها إتهنوا زي
ما تمنوا.
بعد تلاتين.
ريحهم ذهبت.
قامت ثورة.
عشان نعمل دولة.
الثورة شمار .
في مرقه ذهبت.
قحت ومقاومة .
وأحزاب الفكه.
مع (حمدوك.)
فيها إسطرعت.
آمالنا الكانت
بعد ما لبنت
أكلها الطير.
وتماها جراد
عيدانها جفت.
حركات تحرير.
ودعم سريع
غباينهم الكبتوها
كبوها رصاص
فشوها ما إتفشت.
من فشى غبينتو
خربها مدينتو.
الليله الخرطوم
كلها خربت.
وفي دارفور
تاني إشتعلت
حواكيرهم خربت.
عنصريه كراهيه .
خطابات الميديا.
بيها النار .
في أركآنها.
بققت.
لعبوا بيناتهم
سكج مكج.
وفي الترابيز
الضمنة قفلت.
وزي ما شايفين .
إركانها إشتعلت.
هدوا بنيانها
شلعوا أركاناها
لما الناس
هاجرت نزحت.
ناس من جوع.
والخوف ما نامت.
ناس من القنوات
خوف من الجايات
أضينهم شبعت.
ناس قبل الحرب
منها يأست.
بيوتها باعت.
ل (مصر) ل ( تركيا)
هربت وجكت.
شبابا جازفوا
ركبوا السمبك.
واحدين وصلوا.
واحدين .
بيهم غرقت.
ولعها دقلوا
تماها سعادتو
لعبوها وسطنا
حرين وشدت.
لاوقعوا الأثنين.
نحنا وقعنا
وبلدنا الوقعت.
بلدا من يوم.
رفعوا علمها.
ما قامت نهضت.
إتصارعوا فيها
ساسه وعسكر
دخلتها عين.
حاسد إتسحرت.
حبت وحفت.
لقدام ما إتمشت.
واقعه في بئر.
فوقها فيل.
لو ما إنتشلوها.
تكون إتوفت.
سامي الشاعر.
