من القلب الي القلب محمد طه محمد عبد الله يكتب رساله لولاة الولايات. ؛وشرطة المرور السريع.. والاستخبارات.

يا ولاة الولايات يا ناس المرور السريع ويا ناس الاستخبارات..
“اسمعونا كويس الكلام ده كلام”
مواطن خايف على بلدو وما عندنا غير مصلحة الوطن في حاجة خطيرة بتحصل كل يوم وما زول شغال بيها الباص بيطلع من الميناء البري بعدد معروف وبمنفستو معروف.وبعفش مفتش لكن بعد ما يطلع من الميناء بيبقى حاجة تانية خالص..السواق بيقيف في الشارع وبيركب ناس ما في المنفستو ناس ما عندهم اسم ما عندهم هوية..ما معروفين جايين من وين ولا ماشين وين ولا شايلين شنو..وبيركبوهم شماعة يعني الراكب الدافع قروشو والتذكرة بقت غالية نار ما يلقى راحتو..الممر بيبقى مليان والناس واقفة فوق بعض والكرسي البيتحرك فيهو ما بيلقاهو.يا جماعة ده ما كلام ساي.ده خطر على الراكب وخطر على الباص وخطر على البلد كلها..
“يا ولاة الولايات”
انتو المسؤولين قدام الله وقدام الشعب عن أي مواطن بيتحرك في ولايتكم دايرين منكم قرار واضح وصارم اي باص يطلع من الميناء يطلع بمنفستو مختوم وبعدد كراسيهو بس ما يزيد راكب واحد واي شركة تخالف تتحاسب وتتغرم ولو كررتها تتوقف عديل.
“يا شرطة المرورالسريع”
انتو عين الدولة في الشارع دايرين منكم تشديد في كل ارتكاز ما مجاملة ولا تهاون تطابقو عدد الركاب مع المنفستو وتطابقو الحمولة مع عدد الكراسي وتمنعو ركوب اي زول من الشارع والسواق البخالف يتحاسب هو وشركتو لانو الممر معمول للمرور ما معمول لركاب زيادة ولو حصل حادث لا قدر الله الناس الواقفة دي اول ناس بتموت..
“يا ناس الاستخبارات”
ده شغلكم انتو بالذات الناس البيركبو من الشارع ديل منو هويتهم شنو شايلين شنو وليه بيتجاوزو التفتيش في الميناء.. الباص الطلع بعدد معروف واتفتش ما ممكن يبقى في الشارع وسيلة مجهولة تنقل ناس ما معروفين ونحن في ظرف امني صعب والبلد ما بتتحمل ثغرة زي دي
” يا جماعة الشعب السوداني”
ده تعب وعانى وعاش تفاصيل مرعبة ووقف مع قيادتو في خندق واحد وقال جيشا واحد شعبا واحد حير بيها كل الشعوب اقل حاجة يستحقها انو يكون آمن في اكلو وشرابو وترحالو اقل حاجة يستحقها انو يركب باص وهو مرتاح وما خايف على روحو اقل حاجة يستحقها انو يحس انو السلطات خاتاهو في مقدمة أولوياتها.
“كفاية عبث بارواح المواطنين”
كفاية جشع من بعض الشركات كفاية تهاون في تطبيق القانون..نحن بنقول كلامنا ده عسى يلقى آذان صاغية تسمع وتنفذ لانو كلنا مسؤولين وكلنا لازم نبقى عين ساهرة على حق المواطن.
“علي نيتي اكتب وعلي نيتهم يفسرون”
كلمة حق.
محمد طه محمد عبدالله.








