رأي

من القلب الي القلب محمد طه محمد عبد الله يكتب : رساله لوالي الخرطوم والاستخبارات. (حين يغيب القانون يجوع الوطن).

هنالك فيديو متداول في الميديا مفاده ان هنالك تجار يرفعون الأسعار للعيش لخلق جوع والكلام ده ما كلام ساي..الكلام ده واقع حاصل في السوق شوال العيش الذره من ١٧٠٠ إلى ٢٠٠٠
يا والي الخرطوم يا استخبارات
الرساله دي ليكم انتو من مواطن من قلب الخرطوم من قلب السودان يا والي الخرطوم البيحصل ده بيحصل ليه..البيحصل ده بيحصل لانو لا يوجد عقاب رادع ولا يوجد قانون ولا يوجد حساب ولا يوجد خوف..شوال العيش الذره كان ب ١٧٠٠ بقى ب ٢٠٠٠ وبكره ببقى ب ٣٠٠٠ ليه لانو التاجر عارف مافي زول بيسألو ومافي زول بيحاسبو ومافي زول بيوقفو ومافي قانون بيردعو ومافي عقاب بيخوفو..التاجر الكبير في ام درمان وفي سوق ليبيا وفي بحري وفي الخرطوم بيشتري بالملايين وبالمليارات وبيخزن العيش وبيكتنز العيش وبيغرق العيش في البحر عشان السعر يزيد وعشان الناس تجوع وهو عارف مافي عقاب رادع ومافي قانون بيحاكمو ومافي زول بيمسكو عشان كده بيعمل العايزو وبياكل قوت الناس وبيضحك على الناس يا والي الخرطوم لو كان في عقاب رادع ما كان تاجر تجرأ يخزن شوال واحد ولو كان في قانون ما كان تاجر تجرأ يرفع السعر جنيه واحد..لكن لانو مافي عقاب ومافي قانون..التاجر بقى هو القانون والتاجر بقى هو الحكومه والتاجر بقى هو السوق..يا استخبارات يا عيون البلد الساهره البلد دي ضاعت لانو العقاب مافي والقانون مافي التاجر البيحتكر بيمشي حر والمواطن البيجوع بيمشي مقهور والمزارع البيتعب بيمشي مظلوم..يا والي الخرطوم يا استخبارات نحن بناشدكم بالله والوطن ضعوا قانون ضعوا عقاب رادع ضعوا حساب ضعوا خوف خلوا التاجر يعرف انو لو خزن العيش حيتحاسب ولو احتكر السوق حيتحاسب ولو رفع السعر حيتحاسب ولو جوع الناس حيتحاسب..يا والي الخرطوم نحن ما ضد التاجر الشريف. التاجر الشريف على راسنا لكن التاجر الجشع التاجر الطماع التاجر البيحتكر ده لازم يتعاقب عقاب رادع عقاب يخوف غيرو عقاب يخلي كل تاجر يحسب الف حساب قبل ما يلعب بي قوت الناس يا والي الخرطوم المواطن في الخرطوم تعب وصبر واتحمل الحرب واتحمل النزوح واتحمل الغلاء لكن ما بيتحمل الجوع والجوع ده جاي لانو مافي عقاب رادع ومافي قانون يا والي الخرطوم قوم بي دورك سن قانون فعل القانون طبق العقاب افتح المخازن راقب السوق ثبت السعر حاسب المحتكر خلي العيش يصل للناس بسعر معقول بسعر يرضي الله ويرضي الناس..
يا والي الخرطوم يا استخبارات البلد دي امانه عندكم والعيش ده امانه عندكم والناس ديل امانه عندكم لو سكتو الليله بكره الناس حتموت جوع ولو عملتو قانون وعقاب رادع الليله بكره الناس حتاكل وحتشبع وحتدعي ليكم..
اللهم احفظ الخرطوم واحفظ والي الخرطوم واحفظ استخبارات السودان واحفظ اهل السودان واجعل العيش رخيص واجعل القلوب رحيمه واجعل القانون فوق الكل.
محمد طه محمد عبدالله

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى