عبدالعليم الخزين: يكتب … إشارات المطر ..أستاذ محمود الجاك خلاص ساب البلد يا حليلو ياااااا حليلو.

إشارات المطر.(١)

أستاذ محمود الجاك خلاص ساب البلد يا حليلو ياااااا حليلو

بقلم:عبدالعليم الخزين

أسألوا الطلاب والطالبات والمعلمين والمعلمات وغرف المكاتب وساحات طوابير الصباح أسالو الفصول ودفاتر القبول وغرف الكنترول عن استاذ محمود محمد الجاك المربي الطيب الإنسان.

أسالو المعلمات عن فن الإدارة وقنطار الشطارة وعن معني الإخوة والابوة والزمالة وصرف الرواتب بالوكالة وحل المشكلات في إطار العلاقات الأسرية وعن الدفاع عن الحقوق والتخاطب بالاحترام ولفت النظر في قالب وئام من معلم حاز على القلوب ولم يلتفت يوما لما في الجيوب أن محمود المحبوب .

أسألوا أولياء الأمور وابحثو في دفتر الغياب والحضور عن تفاني الاستاذ الحبيب المحبوب محمود الجاك عن أداء أمانة التكليف بكل صدق .

أسالوا الزملاء والزميلات الفاضلات الماجدات عن التعامل والمعاملة عن صدق المشاعر ونبل المقاصد وعفة اليد واللسان واحترام ادمية المعلمة والمعلم الإنسان في القيادة والادارة التربوية والمشاعر الابوية التي يجيدها محمود الجاك مع الجميع بكل حب واحترام وامتنان.

أسألوا علم الإدارة عن فن القيادة والرئادةعن جبر الخواطر وتطيب الخواطر وسمح الكلام وعطر السلام وروح المحبة وكل المحبة وبسمة انسان نبيل وزول اصيل كان دليل وكان خليل .

محمود خلاص ساب البلد ترك جميل الذكريات وسمح الصفات .

أسألوا الفريق وشجر الفريق وطرق الفريق حتي الصغار وبرضوا الكبار الفي الفريق عن محمود الجار عالي المقدار في ضحكتوا وفي بستموا وفي عفتوا وفي همتوا و رقتوا وطيبة كلاموا ورعتوا..

محمود خلاص ساب الفريق بعد ما كان عطر الفريق و وصندلوا وخمرتوا .

كان الجميع ينتظر ساعة زيارتوا وطلتوا نسعد كثير لمن يزورك ويشرفك وتفرح كثير من يدك ساعة زمن بقهوة مزاج تضحك معاهو تفرج كربتك ما هو علاج بي طلتوا.

صوتوا الجميل وسط الفريق دائما جميل كلام وسمح سلام ومطايبة وحنينة في كل شئ ما فيها عتاب ولا معاتبة .

محمود كان أخونا وكان ابونا وكان كبيرنا وكان حبيبنا وكان صديقنا وكان طبيبنا وطبنا بالكلام والسلام والحب والوئام وجزيل الاحترام وعطر صندل فواح ليهو القلوب ترتاح .

كيف يكون حال الفريق في الشهر العظيم ولمة الحبان مع غياب ذاك الجميل انسان وكيف الجلوس بعد السلام وهو كان رونق جلستنا في ليالي رمضان و كيف ممكن نقابل العيد لزول هو كان العيد وفرحتو .

كيف حال هاشم حسن في نشرة الأخبار وكان ود الجاك سر سعادتنا وزهرة جلستنا

كيف يكون كرنفال العيد وهو كان الكرنفال وجمال الكرنفال و ورح الكرنفال وصديق الطلاب بروحه الشبابية وجماله في الخلقه والأخلاق الفاضلة والعلاقات الجميلة يا الله لقد تركت فينا جرحا يا ود الجاك الاستاذ المربي الإداري الاب الحنون الاخ الفاضل الذي لم نراه في حالة غضب مهما ضاقت به الدنيا ..

تذكر يا استاذ محمود ومعلمي وصديقي وأخي الأكبر وخالي وجاري اخر كلماتك ووعدك معايا ..

سوف كتب عنك إشارات وإشارات .

إشارة برق …

اللهم اجعل قبر الحبيب المحبوب المربي الجليل روضة من رياض الجنه.

إشارة مطر…

اللهم اجعله مع الصديقين و الشهداء..

إشارة ندي..

اللهم اجعل البركة في أولاده ونسألك الصبر الجميل

الموت يختار الجياد

انا لله وانا اليه راجعون.

صلوا على الحبيب المصطفى