محمد غبوش يكتب :يا هلال يا رايق.. وقف وقف وسوقني معاك

محمد غبوش يكتب :يا هلال يا رايق.. وقف وقف وسوقني معاك

نعلم أن لمنصب (سيد البلد وزعيمها الأوحد) توابع كثيرة.. ومسؤوليات ضخمة..

لذلك ظل الهلال ملتزماً طوال السنوات الماضية في (تحسين) صورة الكرة السودانية خارجياً.. وظل الهلال (يصطحب) معه أشقائه الصغار للمشاركة في البطولات الإفريقية محافظاً على نسبة مشاركة (4) اندية سودانية في تلك البطولات بفضل نتائجة المميزة..

أحبابنا المريخاب يبدو انهم تعودوا على كده.. لدرجة عايزين الهلال (يسوقهم) معاه أي مكان ماشي ليهو..

الزميل الحبيب Ibrahim Abd Elrahim كتب وهو (زعلان جداً) مهاجماً الهلال ممثلاً في العليقي.. بدعوى أن الهلال لم يطلب مشاركة المريخ معه في الدوري الرواندي..

شفتوا عليكم الله قوة عين بالشكل ده؟

يعني ما كفاية انه مشاركتكم في الأبطال كل موسم بسبب الهلال.. وبسبب نتائجه؟ دايرين تباروهو في أي مكان..

وما كفاية أنه الهلال شايل إسم البلد لوحده في ظل (ادمانكم) للوداع التمهيدي في كل موسم؟..

وما كفاية (السواقة) العملها جان كلود لدفاعتكم في القمم الأخيرة؟..

ابراهومة قال انه العليقي ماداير الفائدة الفنية للمريخ لذلك لم يطالب بمشاركته معه الدوري الرواندي..

طيب انتوا (طولة اللسان) ليكم شنو وكت دايرين الهلال والعليقي يجتهدوا ليكم حتى (لفائدتكم الفنية)..

والفائدة الفنية دي موجودة بس في (الدوري الرواندي) تحديداً.. وبعد ما الهلال طلب المشاركة فيه؟..

طيب.. الهلال داير يشارك عشان يستعد للبطولة الإفريقية والتحديات المنتظراهو فيها.. انتوا دايرين تستعدوا لي شنو؟.. وعشان شنو؟..

يعني الهلال لامن قدم طلبه للمشاركة عرف نفسه (مع انه غير محتاج) وقال (الهلال بطل الممتاز وكأس السودان وواصل لربع نهائي الأبطال في آخر نسخة ومشارك حالياً في البطولة)..

إنتوا يعرفكم للجماعة ديل يقول شنو؟..

تخريمة :

يا هلال يا سايق ويا رايق.. وقف وقف وسوقني معاك..

(غبوش)