يا اهلنا الطيبين يا ناس الغربه ويا ناس الحله بكتب ليكم الليله وقلبي موجوع والله..الوطن ما بخير ابدا وطننا داخل في ازمه حاده شديده حرب ملعونه ليها سنتين حرقت كل شي حرقت بيوتنا ومدارسنا ومستشفياتنا بقت تضرب الكهرباء والموية عشان تكسر المواطن المسكين الناس تعبت شديد والله في الداخل وفي الغربه..ناس فقدت شغلها وناس فقدت بيتها وناس فقدت احبابها لكن رغم الوجع ده كلو بقول ليكم اصبرو..الصبر ما كلام ساي الصبر رجاله الصبر ما تقعد ساي وتبكي الصبر تشتغل وانت موجوع
الصبر لما الكهرباء تقطع تولع شمعه لي جارك..الصبر لما المويه تقطع تدي جارك باقي مويتك الصبر لما تكون في الغربه وقلبك في السودان تصبر وتدعي. زمان اهلنا قالو الجمره بتحرق الواطيها ونحن هسع واطين الجمره كلنا لكن الجمره دي بتعلم الرجال بتعلمنا انو نحب بعض اكتر بتعلمنا انو نتكاتف اكتر بتعلمنا انو الوطن ده غالي شديد ليه لازم نصبر هسع بالذات..اول حاجه لانو ربنا وعدنا قال وبشر الصابرين ما قال بشر اليائسين تاني حاجه لانو عدوك داير يشوفك يائس داير يشوفك بتقول خلاص انتهينا الزول البضرب محطة الكهرباء ده ما بحارب في جيش ده بحارب في صبرك انت..داير يكرهك في بلدك لكن لو صبرت انت غلبتو تالت حاجه لانو التاريخ قال السودان ما مات قبل كده مر بالاستعمار ومر بالحروب ومر بالمجاعات وكل مره كان بقوم اقوى من اول وحيقوم المره دي كمان اقوى باذن الله..طيب نعمل شنو ونحن صابرين ما نقعد نندب حظنا نقيف مع بعض سند الفي الغربه يساعد الفي الداخل الفي الداخل يساعد جارو الكلمه الطيبه صدقه ما تنشر الياس في الفيس والواتساب الكلمه في زمن الحرب بقت زي الرصاصه يا ترفع معنويات الناس يا تكتلهم..وثقو اي حاجه اي جريمه اي محطه ضربوها صورو واحفظو ده حقنا قدام العالم.واهم شي نقيف مع جيشنا جيشنا ده هو الحيطه الباقيه لو وقعت الحيطه دي البلد كلها بتقع يا اخواني والله العظيم الازمه دي ح تعدي..بكره حنرجع السودان ونبنيهو طوبه طوبه بكره حترجع الكهرباء احسن من اول والموية احسن من اول بكره حنحكي لي اولادنا كيف صبرنا وكيف عبرنا السودان هسع ما واقع السودان راكع بس عشان يقوم أقوى الضيق ده ما نهايه ده بدايه جديده اصبرو وصابرو ورابطو وخليكم قراب من بعض ربنا مع الصابرين وربنا مع السودان.
محمدطه محمد عبدالله
