أنا ما داير أزعلكم ولا
داير أجرح زول فيكم أنا داير أتكلم معاكم من القلب للقلب كلام أخ لأخوانو وأخ لأخواتو..ياهلنا نحنا في الغربة غربتنا دي أمانة وكل واحد فينا شايل اسم السودان في وشو وفي لبسو وفي كلامو وفي مشيتو.
نحنا أولاد منو؟
نحنا أولاد آباء وأجداد ربونا على الدين ربونا على الحشمة ربونا على الكرم ربونا على احترام الكبير والعطف على الصغير
أبونا قال لينا
الستر عز والحياء إيمان والنظافة من الإيمان..
وجدنا قال لينا
الراجل بتمسك في كلمتو والمرأة بتتستر في توبها والبيت بتعرفو من بابو..ده تراثنا ده أصلنا ده الورثناه ما جبناه من كتاب جبناه من حبوبة وحبوب من أبونا وأمنا من الديوان والخلوة من المسيد والحلة..
نحنا دولة مسلمة بالفطرة
مسلمة بالتربية مسلمة بالدم نحنا اتربينا على بسم الله قبل الأكل والحمد لله بعد الأكل والسلام قبل الكلام والصلاة في وقتها والضيف نكرمو قبل ما نسألو انت منو..نحنا أهل القرآن أهل الخلاوي أهل المسيد نحنا العلمنا الشعوب علمناهم الكرم علمناهم الجود علمناهم الشهامة
علمناهم كيف يستقبلوا الضيف وكيف يحترموا الجار وكيف يصونوا العرض..
وفي حقنا قال الشاعر
نحنا أهل الكرم والجود وأهل الحشمة والدين نحنا التوبنا ساترنا ونحنا العز واليقين من قمنا صغار تربينا على سيرة الصالحين لا بنعرف الغش والخداع ولا بنرضى بالمشين وقالوا فينا
السوداني أصيل معروف
بالشهامة وكريم ودوام فاتح للضيفان بابو..ستار للعرض وحافظ لي كرامتو لو جارو جعان يقسم معاهو زادو..
أبدأ بيكم انتو يا الرجال
يا أخوي يا سندي يا عزي ليه نطلع الشارع بلبس النوم؟ ليه نطلع بالعراقي والملابس الداخلية باينة؟ ده ما لبس شارع يا أخوي ده لبس بيت والبيت ليهو حرمتو والشارع ليهو احترام انت راجل سوداني راجل أصيل راجل بتاع جلابية نضيفة وعمامة مهيبة وتوب أبيض يلمع.
انت ولد منو؟
انت ولد الرجال الكانوا بلبسوا الجلابية ويمشوا للصلاة قبل الأذان ويقعدوا في الديوان ويحترموا الصغير قبل الكبير..أبوك ما كان بطلع الشارع إلا وهو نضيف ومتعطر..جدك ما كان بطلع إلا وجلابيتو مكوية وعمامة بيضاء تلمع زي النور..وين مشت التربية دي؟ وين مشى التراث ده؟
بقول في حق الراجل
السوداني الراجل السوداني هيبة ووقار يمشي في الشارع زي الأسد المغوار جلابيتو نضيفة وعمامتو تاج وكلمتو سيف ما بيعرف الانكسار..الناس لما تقول السوداني ما لبيس قلبي بوجعني لأنو ده ما نحنا نحنا أهل الذوق وأهل الأناقة وأهل الهيبة.
ويا أخواتي يا ست البنات
انتو يا أخواتي انتو الوجه المشرق انتو الحشمة انتو الحياء.. انتو التربية.. السودانية معروفة في كل الدنيا بالتوب بالستر بالوقار
بالحشمة.
انتو بنات منو؟
انتو بنات الحبوبات الكانن بلبسن التوب ويغطن راسهن ويحفظن بيتهن ويربن أولادهن على الدين والأدب..
حبوبتك كانت تقول
البت سترة والبت حياء والبت البتحشم روحها ربنا بيسترها دنيا وآخرة..يا أختي ويا بتي ما تطلعي السوق بلبس البيت ما تطلعي بصوت عالي ما تخلي الناس تعاين ليك نظرة ما بتشبهك..
بقول في حق السودانية
يا بت التوب يا ست الحشمة يا زينة الدار يا نور الحلة توبك ساترك وحياك تاجك وانتي في عيونا أغلى من الذهب وانتي البت البتربي أجيال ورا أجيال بتعلمي أولادك الدين والآداب بتغرسي فيهم حب الله والرسول وبتخليهم رجال يرفعوا الراس..بتك بتعاين ليك وبتتعلم منك كوني ليها قدوة في الستر في الكلام في المشي في الاحترام..
يا أخواني وأخواتي
الونسة حلوة واللمة حلوة لكن ما في نص الشارع وما بصوت عالي في المطعم وما بجلوس في الرصيف نضايق الناس..نحنا ضيوف في بلد كرمنا واستقبلنا وفتح لينا أبوابو أقل واجب علينا نحترم نظامو ونحترم ذوقو ونحترم شوارعو..
والله أنا ما كتبت الكلام
ده عشان أعيب فيكم كتبتو عشان بحبكم وعشان بغير عليكم وعشان بغير على اسم السودان وعلى تراث آباءنا وأجدادنا.
وختمتها بقول
يا أهلنا ارجعوا للأصل وارجعوا للتراث ارجعوا لتربية أبونا وتربية الجدود نحنا أمة مسلمة بالفطرة وبالدين.. علمنا الشعوب الكرم وعلمنا الشعوب الجود لا تفرطوا في عزكم ولا تفرطوا في ستركم..فالستر هو العز والحياء هو الدين وخلو العالم يقول ديل هم السودانيين..
أهل الكرم وأهل الجود وأهل
الدين المتين..والله قول من القلب إلى القلب من أخوكم البيحبكم وبيتمنى ليكم الستر والعافية.وأن تعودوا لتراث آبائكم وأجدادكم.
محمدطه محمد عبدالله
