ليالي الغرة
إبراهيم احمد جمعة يكتب : سوالف الهمباتة (مصفوفة بناء الشخصية)…1
نعود للكتابة الثقافية في رمضان ونحكي عبر عمودنا ليالي الغرة عن مصفوفة بناء الشخصية من خلال ادب الهمباتة وحكاويهم في زمن الساسة الهمباتة واقزام الهنبت.
ويقول أحدهم:
اسال مني في
غرب البلد
وصعيدا
واسال مني في
ساقلا موالف
صيدا
سمح الزول يخطر
برايا
وحيدا
لا يغلط ولا يقسم
قروش من
ايدا
الابيات تكشف فلسفة طرح المشروع سمح الزول (يخطر) ونشرح المفردة خطر يخطر فهو خاطر اي يسافر لوحده وتدلل عليها كلمة (وحيدا) بمعني لوحده لايلغط ولابقسم قروش المعني هنا واضح الشراكة تجلب الماسي كشراكة الساسة الهنبت فقد تورطو في تدمير الوطن واقتسموا المصالح مالا حراما واقتسموا السمعة السيئة
الشاهد أن مياقنة الهمباته يتهكموا في حرامية السخيلات ونشالي الجيوب ونشالي ضهب النسوان ويغني ود ضحوية ويداعب اخر يدعي منصور وهو سجين معه
قائلا:
الولد البدور الشكره
يامنصور
ماقرن بكار وماشققن
عتمور
كزام للبصل وكت
المراره
تدور
يلقي مرادو وكت
المريسه
تبور
وربما الصورة اعلاه ترسم مشهد حرب المليشيا حيث يظن السكارة والحيارة وعاطلي الموهبة أن لهم مشروعا يقوده بعض مترعي التخمة في فنادق ادس ونيروبي فقط يجيدو (كزيم البصل) وفي آخر أيامه يكتب ود ضحوية:
يوما نقرن البكره
ونمصرو
ثديها
ويوما في عتامير
بعيدا
وجيها
يانفس الرماد المتعه
كملتيها
ابقي لزوما ساعة
القرعه وقعت
فيها
مايلاحظ من خلال شطرات البيت أن اليقين بالممات واضح ومعالم الفرسة والشهامة واضحة فهل يثبت الساسة الهمباتة ؟ام يسعي بعضهم لبيع بعض وإصدار البيانات وتدبيجها من شاكلة بيانات نهني الجيش بتحرير مدني …!! (يانفس الرماد المتعه كملتيها ابقي لزوما ساعة القرعه وقعت فيها ) الشكيه لي ابيدا قويه.
كسرة
بلقاك وطن كيفنو.
قنديلك
بنطفئ
مليون شهيد ليهو
الحوارى
بتصطفي
فيك سابل العز وشاح
يازولا
وفي
شايل الهم جبل
ولا اتركش
منكفي
استغفرالله
