محمد غبوش يكتب :عبادة القتل والشفشفة ولا شنو؟
غايتو المدعو طبيق ده لم يفشل يوماً واحداً في إنتزاع الضحكة من قلوب كل من يسمع هطرقاته..
نافس كل ممثلي الكوميديا وتفوق عليهم.. وإن كانت كوميديا سوداء..
مجارمة وقتلة الدعم السريع تفرغوا للعبادة في رمضان فكانت الهزائم الأخيرة.. عليكم الله في كوميديا أكتر من كده..
كل ممثل يقدم كوميديا بقيادة عادل أمام عليه أن يعلن الإعتزال فوراً.. فقد جاءهم من لا قبل لهم به..
عبادة.. شنو يا طبيق؟ لهؤلاء السفاحين الجاي تقول عليها؟ إلا تكون غايتو عبادة الأصنام والأوثان.. فمن يقتل مواطن برئ بدم بارد الأسلام برئ منه.. ومن يغتصب.. وينهب.. ويشرد.. ويسرق.. ويشفشف لايمكن ان يفكر في صيام اوعبادة..
عليكم الإعتراف بالهزيمة.. وأن الجيش السوداني (بلاكم بل الآبري) والقوات المساندة له (تفّتكم تّف.. وشربتكم جوتّ..وهرستكم هريسة)..
نقص الإمداد هذا لم يكن لإنشغالكم بأداء الصلاة بل بضربات نسور الجو المركزة.. ونقص العتاد ماعشان مافاضين من صلاة التراويح عشان الفرسان (عدموكم نفّاخ النار).. وخسارة القادة الكل يوم في ذيادة ماعشان (إعتكافهم) في المساجد عشان تكتيك وشطارة ومقدرات جيش السودان..
طبيق.. يا ملك الدجل والتلفيق.. نبشرك بأنو قد راح ليكم الطريق.. وسيتواصل فيكم إشتعال الحريق.. ومافات مناظر ولسة راجييكم الغريق..
شاهدنا من قبل فيلم (الباشا تلميذ).. وهانحن نشاهد كوميديا (الباشا تبرير)..
*(غبوش)*
