كل الزوايا
عبدالرحمن دقش ( يا برهان قطع الكهرباء هل هو انقطاع ام لدغ ؟!! )
* نعم لقد دمرت مليشيا الدعم السريع والجنجويد والمرتزقه ( بيوت كلاوي ) اساس الكهرباء في السودان وسرقوا ونزعوا الاعلي فيها وتوقفت محطات الكهرباء !!
* طيب بعد هروبهم ماذا خطط علماء الكهرباء لارجاع ما تم نشله واعاده العمل ولو بعد حين ؟!
* يا سياده رئيس المجلس السيادي الانتقالي الفريق اول ركن عبدالفتاح البرهان لو كانت هنالك حكومه ( جد.. جد ) وليست بالتكليف من الوزراء والوزيرات لما كنا دخلنا في ازمات الكهرباء وبالتالي سوف ينتهي عبث وجريمه الانقطاع والقطع ولكن تستمر ( شماعه الكي ) علي اجساد الشعب الممكون فتلك يرفضها العقل والمنطق !!
* بعدين يا برهان اين وزير الكهرباء المكلف ( المنفلت ) الذي يحتاج الي الوطنيه ولا تزال ( سكرتها ) تتواصل وهو علي الدوام يردد ويغني ان انقطاع الكهرباء سوف ينتهي و( جايه في زمن لسه ) ؟!!
ان ما يحدث في قطع الكهرباء في كل زمن هو كارثه ولا يمكن السكوت عنه والسودان بشكل الحكومه ( بالتكليف ) !!
* زمان وقبل حرب 15 ابريل 2023م قد تحمل الشعب المكلوم اذي وتردي وانزلاق انقطاع. الكهرباء وفي عهد الثوره ايضا قد طفح الكيل وعاش الناس مع كلمه (برمجه ) وكان فيها الانقطاع الجائر الظالم والذي يفرق بين الناس ولا يشمل الجميع وتستمر ساعات الانقطاع بالليل والنهار وسط الزيف والتعدي ومن الاخر علاج الكي وكانت شماعه للشعب ويفضل وزير الكهرباء المكلف يردد ( راجعه في زمن جاي …في زمن لسه…) كما قالها في اغنيته الحلوه صديقنا الشاعر والصحفي ( فرده ) المتمكن شاعر الحب والجمال. ( اسحاق الحلنقي ) والذي اطلقوا عليه رئيس جمهوريه الحب وربنا يحفظه !!
* يا كتله اهل السودان رغم ما تركته الحرب من تدمير وتكسير محطات الكهرباء فلا تزال حكومه السودان تعتمد علي وزاره الكهرباء وتعلم بالتفكيك بها واصبحت الوزاره تمارس جمع تكاليف الكهرباء المحلوله من جيوب الشعب وتواصل وزاره الكهرباء في الضرب والكهرباء ( متمرده ) وقاطعه ومقطوعه تماما !!
* يا وزير الكهرباء المكلف نذكرك بعهد حكم الراحل جعفر نميري وكانت الكهرباء تقطع قليلا جدا وترجع بسرعه وعند رجوعها يردد شعب السودان من الكبار والصغار ( الكهرباء جات .. . املو الباقات ) !!
* يا برهان الذي كان في خيالنا بعد ثوره ديسمبر 2018م المجيده ان تعود الكهرباء بالتي هي احسن وتعب الشعب من ( غول ) البرمجه الظالمه ولكن ذلك لم يحدث وظل الانقطاع يزداد عمقا. وحتي في ايام شهر رمضان الكريم !!
* نطالب البرهان حاكم السودان الانتقالي الاتجاه والاعتماد علي دوله خارجيه ( لفك ) تمرد الكهرباء والمياه والذي عرفناه ان دوله المانيا اتت في عهدكم لمعالجه ازمه الكهرباء ولكن لم تجد الترحيب !!
* اعتقد انه بعد نهايه الحرب في السودان كليه نجد الفرصه السهله وهو الاتصال باي دوله عالميه حتي ترفع عن شعب السودان مشاكل الازمات في الكهرباء والمياه واما غيرها من الازمات فسوف يتحملها الشعب وكفايه من ازمات وغلاء الرغيف والبنزين والغاز والسكر والزيت و..و..و..وكلها فيها الاذي الواضح وضوح الشمس في رابعه النهار !!
* يا حكومه السودان و( دبوره ) الوزير او الوزيره ( المكلف ) اذكروا لنا دوله واحده في العالم فيها انقطاع او انفلات الكهرباء ووصلت اليه كما حدث في السودان ورغم ذلك فشعبه يظل واقفا بلا ارجل وانقطاع الكهرباء يضربه في كل الاوقات والشعب صابر في زمن دوله الحرب والحريه والتغيير والعداله !!
* يا وزير الكهرباء المكلف في السودان اي عداله غير العبث الذي يحصل عند انقطاع الكهرباء والشعب يموت عند الذهاب الي المستشفيات والجري واللهث لانقاذ من دخل المستشفي والكهرباء قاطعه وليس لساعات بل لايام متواصله والشوارع مظلمه وهامده ؟!!
اكيد ان البرمجه عند انقطاع الكهرباء تهدر وتهدد وتدمر العمليات داخل المستشفيات والصناعه وارزاق البشر وتحطم الامال والارزاق وتضيع في مهب الريح !!
* هل يعيش وزير الكهرباء المكلف في حكومه البرهان في وجع وهم انقطاع الكهرباء وهو علي علم ويري ويسمع عندما يحدث انقطاع الكهرباء وبعدها يتم اغلاق المحلات والورش والمصانع ويموت المرضي بالمستشفيات ؟!!
يا وزير الكهرباء المكلف ماذا تفدي وتقول ان قوائم الموتي يجب ان تكون من ضمن ( قائمه الجريمه ) واسبابها انقطاع الكهرباء والتي وصلت مرحله الخيال. !!
* من حق شعب السودان ان يعرف ان وزير الكهرباء المكلف في حكومه البرهان ليس معه ( حته ) وشويه وطنيه وهنا نحكي له حكايه مثيره عن انقطاع الكهرباء. !!
* قبل اكثر من ثلاثين من الاعوام وفي دوله المانيا. كانت قد انقطعت الكهرباء لدقيقه واحده ( اكرر دقيقه واحده. وليست ساعات او يوما واحدا. ) وبعدها قامت الدنيا ولم تقعد وقامت المظاهرات العنيفه والاستنكارات لايام واعتذر الوزير ولكن في السودان قد يصل الانقطاع والقطع الي ايام لا تعد وبعد نهايه الحرب قد استمر الانقطاع الي ثلاثه اسابيع والشعب الجبار يتحمل التعدي والظلم ويصمت ويسكت وزير الكهرباء المكلف. !!
يا وزير الكهرباء المكلف ( الهمام ) الي متي يتواصل انقطاع الكهرباء وهو سيد الاسم في الانهيار ؟!!!
