رساله الي الشعب السوداني في جميع أنحاء المعموره
يا عموم أهل السودان يا أهل العزة والكرامة يا أولاد النيل والتراب يا من صنعتم التاريخ بدمكم وعرقكم وصبركم الليلة
رسالتي ليكم رسالة وطنية ورسالة محبة ورسالة احترام من قلب سوداني بحب وطنو أكتر من روحو وبحب أهلو أكتر من نفسو.نحن سودانيين وده شرف ما بعدو شرف نحن أولاد بلد فيها النيل وفيها الدهب وفيها الأرض وفيها الخير وفيها الرجال وفيها النساء الصابرات وفيها الأطفال الأبطال بلد ما بتتكسر وما بتنهزم وما بتتباع.
يا أهل السودان
وطننا ده ما قطعة أرض ساكت وطننا ده عرضنا وكرامتنا وشرفنا وتاريخنا ومستقبل أولادنا وطننا ده هو أمدرمان والخرطوم وبحري ومدني وكسلا وبورتسودان والفاشر ونيالا والأبيض وسنار وكردفان ودارفور وكل شبر فيهو دم شهيد وعرق فلاح ودمعة أم ودعوة أب.
الوطن ده ما حق
حزب ولا حق جماعة ولا حق قبيلة ولا حق جهة الوطن ده حقنا كلنا حق الشمالي والجنوبي والشرقي والغربي حق الجندي والمدني حق المغترب والنازح حق الكبير والصغير حقنا كلنا وما في زول عندو حق يبيعو ولا يفرط فيهو ولا يساوم عليهو.
يا سودانيين لو
اختلفنا في السياسة ما نختلف في الوطن ولو اختلفنا في الرأي ما نختلف في التراب ولو اختلفنا في القبيلة ما نختلف في النيل نحن مختلفين في كل حاجة لكن متفقين في حاجة واحدة
إنو السودان فوق
الجميع وإنو علم السودان فوق كل الأعلام وإنو تراب السودان أغلى من الدم.
نتمنى من المشاهد
على هذا الفيديو والقارئ لهذا البوست أن نكون كشعب سوداني بالاحترام لبعضنا البعض..يا جماعة شوفوا الفيديو ده وشوفوا صديق أحمد وعبدالرحمن عبدالله كيف بيتعاملوا مع بعض شوفوا الاحترام كيف شوفوا الأدب كيف شوفوا كل واحد كيف بيدي التاني مساحتو وبيحتفي بي جمالو وما داير يغلبو ولا داير يثبت إنو أحسن منو.
ده هو الدرس يا
أهل السودان ده هو الفيديو المفروض كل زول فينا يشوفو ويتعلم منو لأنو الفن هنا ما كان صوت وبس الفن هنا كان احترام وأدب وتواضع ومعرفة قدر الآخرين.
نحن كشعب سوداني
لو دايرين نبني وطننا لازم نبدأ بالاحترام نحترم الكبير ونحترم الصغير نحترم الجار ونحترم القريب ونحترم الغريب نحترم رأي أخونا حتى لو كان مختلف عن رأينا نحترم قبيلتو ونحترم منطقتو ونحترم لونو ونحترم دينو.
الاحترام ده ما ضعف
الاحترام ده قوة والاحترام ده هو الوطنية الحقيقية وهذه لا بد أن ترسخ في أذهان معلم في التربية الوطنية.
يا معلمين السودان
انتو الأساس انتو البتربوا الأجيال وانتو البتغرسوا في قلوب أولادنا حب الوطن وحب بعضهم البعض علموا أولادنا إنو السوداني أخو السوداني وعلموهم إنو الاحترام قبل العلم وعلموهم إنو الكلمة الطيبة بتبني وطن والكلمة الجارحة بتهدم وطن.
وعلموهم إنو صديق
أحمد وعبدالرحمن عبدالله ما كانوا كبار بصوتهم بس كانوا كبار بأخلاقهم واحترامهم لبعض.
يا معلم التربية
الوطنية خلي درسك ما يكون كلام في الكراس خلي درسك يكون قدوة خلي أولادك يشوفوا فيك الاحترام ويشوفوا فيك التسامح ويشوفوا فيك حب السودان..
عشان يتعلموا منك
إنو الوطن ما نشيد بنحفظو الوطن سلوك بنعيشو كل يوم في البيت وفي المدرسة وفي الشارع وفي السوق. والصلات الصادقة بين أفراد المجتمع السوداني.
با أهل السودان
الصلة الصادقة هي البتخلي المجتمع قوي الصلة الصادقة هي إنو الجار يتفقد جارو والأخ يتفقد أخوهو والصديق يقيف مع صديقو في الحارة والبارد.
الصلة الصادقة ما
مصلحة وما نفاق وما كلام ساكت الصلة الصادقة هي إنك تحب لأخوك زي ما بتحب لنفسك وتفرح لفرحو وتبكي لبكاهو وتشيل همو زي همك.
تعالوا نرجع صلاتنا
الصادقة زي زمان لما كنا بناكل من صحن واحد وبنشرب الجبنة من إبريق واحد وبنفرح مع بعض وبنحزن مع بعض وبنقيف مع بعض تعالوا نرجع للمحبة الصادقة البلا مصلحة وللأخوة الصادقة البلا فرقة وللجيرة الصادقة البلا حسد
يا أبطال القوات
المسلحة انتو درع الوطن وانتو سور الوطن وانتو عز الوطن انتو الواقفين في الميدان بتدافعوا عن العرض والأرض وانتو البتموتوا عشان نحن نعيش وانتو البتساهروا عشان نحن ننوم نحن معاكم بقلوبنا وبدعائنا وبمالنا وبأولادنا ووالله ما بنخذلكم وما بننسى تضحياتكم.
يا شهداء السودان
انتو ما متوا انتو حيين في قلوبنا وفي تاريخنا وفي وجداننا دمكم هو النور البنور لينا الطريق وروحكم هي الروح البتخلينا نقيف ونواصل ونبني انتو دفعتوا أغلى حاجة عندكم عشان. السودان يعيش وعشان أولادنا يعيشوا في عزة وكرامة.
يا أمهات السودان
انتن مصنع الرجال ومصنع الأبطال انتن الربيتو الشهداء وربيتو الجنود وربيتو المعلمين والأطباء والمهندسين صبركن هو الصبر الخلانا واقفين ودعاكن هو الدعاء الخلانا صامدين.
يا شباب السودان
انتو الأمل وانتو المستقبل وانتو القوة وانتو النور البلد دي حقتكم والبلد دي منتظراكم ما تخلوها وما تبيعوها وما تكسروها قوموا ابنوها بالعلم وبالعمل وبالوحدة وبالحب ما بالكراهية ولا بالفرقة ولا بالعنصرية.
يا أهل السودان
تعالوا نتوحد وتعالوا نتلما وتعالوا ننبذ الفرقة والعنصرية والجهوية تعالوا نغسل قلوبنا من الحقد والحسد والكراهية تعالوا نكون يد واحدة وقلب واحد وصوت واحد عشان نبني بلدنا من تاني ونرجعها أحسن من أول.
السودان ما بيموت
السودان ما بيقع السودان ما بيندفن السودان زي النيل كل ما حاولوا يقطعوهو بيرجع يجري وكل ما حاولوا يطفوهو بيرجع ينور وكل ما حاولوا يكسروهو بيرجع أقوى.
وحيجي اليوم البنرفع
فيه علم السودان في كل مدينة وفي كل قرية وفي كل بيت وحنقول للعالم كلو نحن سودانيين ونحن رجعنا ونحن اتوحدنا ونحن بنينا بلدنا من تاني بيدنا وبدمنا وبحبنا.
ختاما الخلاصة
السودان أولا والسودان أخيرا والسودان فوق الجميع والاحترام بيناتنا هو الوطنية والصلات الصادقة بيناتنا هي القوة والمعلم هو البغرسها فينا والفيديو ده هو الدليل إنو الكبار باحترامهم علمونا أكتر من ألف كتاب ولو متنا كلنا يفضل السودان ولو اتشردنا كلنا حنرجع للسودان ولو ضحينا بكل حاجة ما بنضحي بالسودان لأنو السودان هو نحن ونحن هو السودان.
اللهم احفظ السودان وأهل السودان.
اللهم انصر القوات المسلحة السودانية.
اللهم ارحم شهداءنا واشف جرحانا ورد غائبنا سالما.
ختاما الشكر كل الشكر للاديب
د.علي الشيخ حنين واسرة منتدي ملتقي الفنون حيث استعنت بالفيديو من قبلهم.
محمدطه محمد عبدالله
